വാഷിംഗ്ടണ്‍: യോഗപഠനത്തിന് എതിരെ നല്‍കിയ ഹര്‍ജി അമേരിക്കന്‍ കോടതി തള്ളി. യോഗ മതേതരമാണെന്ന് വ്യക്തമാക്കിയ കോടതി അത് പാഠ്യപദ്ധതിയില്‍ ഉള്‍പ്പെടുത്തുന്നത് അംഗീകരിക്കുകയും ചെയ്തു. യോഗ പഠനം വര്‍ഗീയമെന്ന് മുദ്രകുത്തുന്ന ഭാരതത്തിലെ ““മതേതരവാദികളുടെ കണ്ണു തുറപ്പിക്കേണ്ട വിധിയാണ് കാലിഫോര്‍ണിയയിലെ അപ്പീലുകള്‍ക്കുള്ള നാലാമത് ജില്ലാക്കോടതിയുടേത്. യോഗ മതേരതമെന്ന് വിധിച്ച കീഴ്‌ക്കോടതി വിധിയാണ് കാലിഫോര്‍ണിയക്കോടതി ശരിവെച്ചത്.
പ്രാഥമിക സ്‌കൂളുകളില്‍ പഠിപ്പിക്കുന്ന യോഗ ഹിന്ദുത്വത്തിലേക്കുള്ള കവാടമൊന്നുമല്ല. അത് പഠിപ്പിക്കുന്നത് മതസ്വാതന്ത്യ ലംഘനവുമല്ല. അത് മതേതരമാണ്.
മതത്തിലേക്ക് കുട്ടികളെ തിരിച്ചുവിടുന്നതോ വിലക്കുന്നതോ അല്ല. അത് സ്‌കൂളുകളെ മതത്തില്‍ കുരുക്കുന്നതുമല്ല. മൂന്നംഗ അപ്പീല്‍ കോടതി ദു: ഖവെള്ളിയാഴ്ച നടന്ന സിറ്റിംഗില്‍ വ്യക്തമാക്കി.സാന്‍ ഡിയാഗോയിലെ എന്‍സിനിറ്റാസ് എലിമെന്ററി സ്‌കൂളില്‍ യോഗ പഠിപ്പിക്കുന്നതിന് എതിരെ രണ്ടു കുട്ടികളുടെ രക്ഷിതാക്കള്‍ നല്‍കിയ ഹര്‍ജി കീഴ്‌ക്കോടതി തള്ളിയിരുന്നു. യോഗ ആത്മീയമാണെന്നും അതിനാല്‍ അത് ഭരണഘടനാ വിരുദ്ധമാണെന്നും അത് ഹിന്ദുമതാനുസൃതമാണെന്നുമാണ് ഹര്‍ജിക്കാര്‍ വാദിച്ചത്. കീഴക്കോടതി വിധി അപ്പീല്‍ കോടതിയും അംഗീകരിച്ചു.
കോടതി വിധിയില്‍ നിരാശയുണ്ട്. രക്ഷിതാക്കള്‍ക്കു വേണ്ടി ഹാജരായ അഭിഭാഷകന്‍ ഡീന്‍ ബ്രോയ്‌ലസ് പറഞ്ഞു. സൂര്യ ദേവനോട് പ്രാര്‍ഥിക്കുകയും തലകുനിച്ച് വണങ്ങുകയും ആരാധിക്കുകയും ചെയ്യുന്ന ഹിന്ദു രീതി കുട്ടികളെ പഠിപ്പിക്കാന്‍ അരനൂറ്റാണ്ടിനിടയ്‌ക്ക് ഒരു പൊതു സ്‌കൂളിനെയും മറ്റൊരു കോടതിയും അനുവദിച്ചിട്ടില്ല.ബ്രോയ്‌ലസ് പറയുന്നു.
2012 മുതല്‍ ഈ വിദ്യാഭ്യാസ ജില്ലയില്‍ യോഗ ആരോഗ്യത്തിന് നല്ലത് എന്ന നിലയ്‌ക്ക് പഠിപ്പിക്കുന്നുണ്ട്. ഇവിടങ്ങളിലെ സ്‌കൂളുകളില്‍ യോഗ പഠിപ്പിക്കാന്‍ എന്‍സിനറ്റാസിലുള്ള സോണിമ ഫൗണ്ടേഷന്‍ ഇരുപതുലക്ഷം ഡോളര്‍ നല്‍കുകയും ചെയ്തിരുന്നു. കുട്ടികളെ പള്ളിയില്‍ നിന്ന് അകറ്റുന്നതാണെന്നും അഷ്ടാംഗയോഗ ഹിന്ദു വിശ്വാസം പ്രോല്‍സാഹിപ്പിക്കുന്നതാണെന്നും ഹര്‍ജിക്കാര്‍ പറയുന്നു. യോഗ പ്രത്യേക ശാരീരിക, ശ്വസന പരിശീലനമാണെന്നും മനസംഘര്‍ഷമകറ്റുന്നതാണെന്നും അതും ക്രിയാത്മക ഗുണങ്ങള്‍ വളര്‍ത്താനുള്ള മാര്‍ഗങ്ങളും ചേര്‍ത്തുള്ള പരിശീലനമാണ് നല്‍കുന്നതെന്നും കീഴ്‌ക്കോടതി വ്യക്തമാക്കിയിരുന്നു.
കിന്റര്‍ഗാര്‍ട്ടന്‍ മുതല്‍ ആറാം കഌസ് വരെയുള്ള കുട്ടികള്‍ക്ക് ആഴ്ചയില്‍ , അരമണിക്കൂര്‍ വീതമുള്ള രണ്ടു ക്ളാസുകളാണ് നല്‍കുന്നത്.കുട്ടികളില്‍ വലിയ മാറ്റമാണ് കാണാന്‍ കഴിയുന്നത്. ജില്ലാ സൂപ്രണ്ട് ടിം ബെയ്ഡ് പറഞ്ഞു.
കുട്ടികള്‍ കരുത്തുള്ളവരാകുന്നു, അനുസരണയുള്ളവരാകുന്നു, ശ്രദ്ധ കേന്ദ്രീകരിക്കാന്‍ അവര്‍ക്ക് കൂടുതല്‍ കഴിവും ലഭിക്കുന്നു. 21 ാം നൂറ്റാണ്ടില്‍ ഇതാണ് വേണ്ടത്. അദ്ദേഹം പറഞ്ഞു. യോഗ അമേരിക്കയില്‍ വ്യാപകമായിക്കഴിഞ്ഞു. ഈ സമയത്ത് ഇത്തരമൊരു കേസ് തന്നെ അമ്പരപ്പിച്ചു. അദ്ദേഹം പറഞ്ഞു.
