നെയ്റോബി: കെനിയയിലെ ഗരിസ യൂണിവേഴ്സിറ്റി കോളജ് കാമ്പസില് ഖഴിഞ്ഞ ദിവസമുണ്ടായ വെടിവെയ്പ്പുമായി ബന്ധപ്പെട്ട് അഞ്ച് പേരെ പോലീസ് അറസ്റ്റു ചെയ്തു. എന്നാല് അറസ്റ്റിനെ സംബന്ധിച്ച കൂടുതല് വിവരങ്ങള് പുറത്തുവിട്ടിട്ടില്ല.
ഇവരെ ചോദ്യം ചെയ്യുകയാണെന്ന് കെനിയയിലെ ആഭ്യന്തരമന്ത്രി ജോസഫ് കൈസേരി പറഞ്ഞതായി അന്താരാഷ്ട്ര ദൃശ്യമാദ്ധ്യമങ്ങള് റിപ്പോര്ട്ട് ചെയ്തു.
വ്യാഴാഴ്ച പുലര്ച്ചെ ഗരിസ യൂണിവേഴ്സിറ്റി കോളേജ് കാമ്പസിലേക്ക് ഗ്രനേഡുകളും ഓട്ടോമാറ്റിക് റൈഫിളുകളുമായി പാഞ്ഞെത്തിയ മുംഖംമൂടി ധരിച്ച അല്ക്വ ഇദയുമായി ബന്ധമുള്ള അല് ഷബാബ് ഭീകരര് തുരു തുരാ വെടിയുതിര്ക്കുകയായിരുന്നു. സംഭവത്തില് 147 മരിക്കുകയും 79 പേര്ക്ക് പരിക്കേല്ക്കുകയും ചെയ്തു.
1998ല് നയിറോബിയിലെ യു.എസ് എംബസിയില് അല്ക്വഇദ നടത്തിയ ബോംബ് ആക്രമണത്തില് 213 പേര് മരിച്ചതിന് ശേഷം കെനിയയില് ഉണ്ടാകുന്ന ഏറ്റവും വലിയ ആക്രമണമാണിത്.
ഇന്ത്യയിലെ വിദേശകാര്യ മന്ത്രാലയ വക്താവ് സെയിദ് അക്ബറുദ്ദീന് ഭീകരാക്രമണത്തെ അപലപിച്ചു. കെനിയയിലെ ജനങ്ങളുടേയും ഗവണ്മെന്റിന്റേയും മരിച്ചവരുടെ കുടുംബത്തിന്റേയും ദുഃഖത്തില് ഇന്ത്യ പങ്ക് ചേരുന്നതായി അദ്ദേഹം ട്വീറ്റ് ചെയ്തു.
