സന: അല്ഖ്വയ്ദയുടേയും ഇറാന്റേയും പിന്തുണയുള്ള ഹൂതി വിമതസേനയ്ക്ക് എതിരായ സഖ്യസേനയുടെ പോരാട്ടം കരുത്താര്ജ്ജിച്ചു. സൗദിയുടെ നേതൃത്വത്തിലുള്ള സൈന്യത്തിന്റെ വ്യോമാക്രമണത്തില് കഴിഞ്ഞദിവസം മാത്രം മരിച്ചവരുടെ എണ്ണം 45 കവിഞ്ഞു. തുറമുഖനഗരങ്ങള് പിടിയിലൊതുക്കാനുള്ള ശ്രമങ്ങളാണ് സഖ്യസൈന്യം നടത്തുന്നത്.
ഒന്നര ലക്ഷത്തോളം സൈനികരെ സൗദി യെമനിലേക്ക് നിയോഗിച്ചിട്ടുണ്ട്. ഇവര് കരയുദ്ധത്തിന് ഇതുവരെ ഇറങ്ങിയിട്ടില്ലെങ്കിലും വൈകാതെ അവ ഇറങ്ങുമെന്നാണ് സൂചന. ഏതുനിമിഷവും സൗദി സൈന്യം യെമനിലേക്ക് മാര്ച്ച് ചെയ്യും. അതോടെ ദിവസങ്ങളായി തുടരുന്ന വ്യോമാക്രമണം കരയുദ്ധത്തിലേക്ക് നീളും. സംഘര്ഷം കനക്കും. ഇത് മധ്യേഷ്യയില് മൊത്തം ഗുരുതരമായ പ്രത്യാഘാതം ഉണ്ടാക്കും. ആയിരക്കണക്കിന് മലയാളികള് ഗള്ഫ് രാജ്യങ്ങളില് ജോലി ചെയ്യുന്നുണ്ട്. പ്രശ്നം രൂക്ഷമാക്കുന്നത് ഇവരെയും ബാധിക്കാം.
യെമനിലെ തന്ത്രപ്രധാന സ്ഥലങ്ങള് പിടിച്ചടക്കിയ വിമതര് പ്രസിഡന്റിനെ അധികാര ഭ്രഷ്ടനാക്കിയിട്ടുമുണ്ട്. അദ്ദേഹം ഇപ്പോള് സൗദിയില് രാഷ്ട്രീയ അഭയം തേടിയിരിക്കുകയാണ്. യെമന് ഇപ്പോള് ഇറാന്റെ സ്വാധീനത്തിലാണ്. ഇത് തടയാന് കൂടിയാണ് സൗദിയുടെ നേതൃത്വത്തിലുള്ള സഖ്യസേന ഇറങ്ങിയത്.
കരയുദ്ധം തുടങ്ങിയാല് അത് ഭയാനകമായ പ്രശ്നങ്ങള് ഉണ്ടാക്കും. ഹൂതി വിമതര് കര്ശന പരിശീലനം ലഭിച്ച ഒളിപ്പോരാളികളാണ്. യുദ്ധങ്ങള് നേരിട്ട് തഴമ്പിച്ച പോരാളികള്.അവര് സൗദിയിലേക്ക് നുഴഞ്ഞുകയറാനും സാധ്യതയുണ്ട്.സൗദിയില് ചാവേറാക്രമണം നടത്തുമെന്ന് ഹൂതി വിമതര് ഭീഷണി മുഴക്കിയിട്ടുമുണ്ട്. അങ്ങനെവന്നാല് അത് ഗള്ഫിലാകെ ആശങ്ക സൃഷ്ടിക്കും. ഇവര്ക്കൊപ്പം അല്ഖ്വയ്ദകൂടി ചേര്ന്നാല് അവസ്ഥ വഷളാകും.
അറേബ്യന് മേഖലയിലെ അല്ഖ്വയ്ദയുടെ പ്രധാനകേന്ദ്രമാണ് യെമന്. വ്യോമാക്രമണം കൂടാതെ ഈജിപ്തിന്റെ യുദ്ധക്കപ്പലുകളില് നിന്ന് തീരമേഖലയിലെ ഹൂതി കേന്ദ്രങ്ങളിലേക്ക് അതിശക്തമായ വെടിവയ്പ്പും നടത്തുന്നുണ്ട്. തുറമുഖ നഗരമായ സിന്ജിബാറിലാണ് വെടിവയ്പ്പ് നടന്നത്. കരയുദ്ധത്തെക്കുറിച്ച് ഈജിപ്തും ചര്ച്ചയാരംഭിച്ചു. എന്നാല് കരയുദ്ധം തുടങ്ങും മുന്പ് വ്യോമാക്രമണത്തിലൂടെ ഹൂതി സേനയുടെ ശക്തി ക്ഷയിപ്പിക്കാനാണ് സഖ്യസേനയുടെ ശ്രമം. കരയുദ്ധം അതിശക്തമാകുമെന്നും അത് നീളുമെന്നും ചോരപ്പുഴ ഒഴുകുമെന്നുമാണ് ആശങ്ക.
യുദ്ധം ഇതിനകം ഗള്ഫ് മേഖലയെ രണ്ടാക്കി വിഭജിച്ചുകഴിഞ്ഞു. സുന്നികളും ഷിയാകളും. സൗദിയുടെ നേതൃത്വത്തില് ഒന്പതു രാജ്യങ്ങള് സുന്നി സഖ്യത്തിലാണ്. യുഎഇ, കുവൈറ്റ്, ബഹ്റൈന്, ഖത്തര്, ജോര്ദ്ദാന്, മൊറോക്കോ, ഈജിപ്ത്, സുഡാന് തുടങ്ങിയ രാജ്യങ്ങളാണ് സൗദി സഖ്യത്തിലുള്ളത്.
