പറവൂര്: മദ്യപിച്ച് മദോന്മത്തരായി എത്തിയ ഡിവൈഎഫ്ഐ പ്രവര്ത്തകര് കോട്ടുവള്ളി തൃക്കപുരം ക്ഷേത്രത്തിലെ വലിയവിളക്ക് ഉത്സവം അലങ്കോലപ്പെടുത്തി. കഴിഞ്ഞ രാത്രിയിലാണ് ഉത്സവം കണ്ടുകൊണ്ടിരുന്ന സ്ത്രീകള്ക്കിടയിലേക്ക് ചെന്ന് മദ്യത്തിന്റെ ലഹരിയില് ആയിരുന്ന ഡിവൈഎഫ്ഐ പ്രവര്ത്തകരായ വിനീത്, വിനീഷ്, അശ്വിന്, അതുലും കണ്ടാലറിയാവുന്ന കുറച്ചുപേരും ചേര്ന്ന് ശല്യപ്പെടുത്തിയത്.
ഇത് കണ്ടുനിന്ന ആളുകളും അമ്പലകമ്മറ്റിക്കാരും പ്രതികരിച്ചെങ്കിലും ഇവരെ മര്ദ്ദിക്കുകയായിരുന്നു ഡിവൈഎഫ്ഐക്കാര്. അരിശം തീരാതെ പുറത്തേക്കിറങ്ങിയ ഇവര് അമ്പലത്തിന്റെ കൊടിതോരണങ്ങള് വ്യാപകമായി നശിപ്പിച്ചു.
ഇതിനുശേഷം രാത്രി 11 മണിയോടുകൂടി ഉത്സവം കഴിഞ്ഞ് മടങ്ങുകയായിരുന്ന ആളുകളെ വിവിധ സ്ഥലങ്ങളില് തമ്പടിച്ചിരുന്ന സിപിഎം, ഡിവൈഎഫ്ഐ പ്രവര്ത്തകര് വളഞ്ഞിട്ട് ആക്രമിക്കുകയായിരുന്നു. അക്രമത്തില് പരസ്പരം അടിയേറ്റ ഡിവൈഎഫ്ഐക്കാര് ആശുപത്രിയില് ചികിത്സ തേടിയിരിക്കുകയാണ്. ഉത്സവത്തിന് അക്രമം കാണിച്ചവര്ക്കെതിരെ നടപടിയെടുക്കണമെന്നാവശ്യപ്പെട്ട് പോലീസില് പരാതി നല്കിയിരിക്കുകയാണ് ക്ഷേത്രകമ്മറ്റി.
