സഹസ്രാരാംബുജാസീനാ സര്വ വര്ണ വിശോഭിതാ
രേതോവാസിനീ സര്വശസ്ത്രവതീ സര്വതോമുഖീ
371. സഹസ്രാരംബുജാസീനാ – സഹസ്രാരപദ്മത്തില് സ്ഥിതിചെയ്യുന്നവള്. (സഹസ്രദളപദ്മവും സഹസ്രാരചക്രവുമാണു വേണ്ടത്. പക്ഷേ കുണ്ഡലിനീയോഗത്തിന്റെ ചര്ച്ചയില് ചക്രത്തിനു ദളവും പദ്മത്തിന് ആരവും പ്രയോഗിച്ചുകാണാം). സുഷുമ്നാനാളത്തിന്റെ മുകളറ്റം തലയോട്ടിക്കുള്ളിലുള്ള മജ്ജാകന്ദത്തില് അന്തര്ഭവിച്ചിട്ടുള്ള ആയിരം ഇതളുകളുള്ള പദ്മമെന്നോ ആയിരം ആരക്കാലുകളുള്ള ചക്രമെന്നോ പറയാവുന്ന നാഡീകേന്ദ്രത്തില് പ്രവേശിക്കുന്നു. ആ നാഡീകേന്ദ്രമാകുന്ന താമരയ്ക്കുള്ളില് കര്ണികാസ്ഥാനത്തു സ്ഥിതിചെയ്യുന്നവള്.
372. സര്വവര്ണവിശോഭിതാ – എല്ലാ നിറങ്ങളിലും ശോഭിക്കുന്നവള്. എല്ലാ മന്ത്രവര്ണങ്ങളുംകൊണ്ടു ശോഭിക്കുന്നവള് എന്നും വ്യാഖ്യാനിക്കാം.
373. രേതോവാസിനീ – രേതസ്സില് വസിക്കുന്നവള്. എല്ലാ സൃഷ്ടിക്കും കാരണഭൂത, സൃഷ്ടിശക്തി എന്നും സൂചിപ്പിക്കുന്നു.
374. സര്വശസ്ത്രവതീ – എല്ലാ ആയുധങ്ങളും ധരിച്ചവള്.
375. സര്വതോമുഖീ – എല്ലായിടത്തും മുഖമുള്ളവള്, എണ്ണമറ്റ മുഖങ്ങളുള്ളവള്.
തുടരും
