ഔജ: തിക്രിതില് ഐസിസും ഇറാഖ് സൈന്യവും തമ്മിലുള്ള ശക്തമായ യുദ്ധത്തില് സദാം ഹുസൈന്റെ ശവകുടീരം പൂര്ണ്ണമായും തകര്ക്കപ്പെട്ടു. ഏകാധിപതിയായ സദാം ഹുസൈന്റെ ജന്മനഗരമായ തിക്രിതിനു ചുറ്റമുള്ള യുദ്ധം നഗരകേന്ദ്രത്തിലെത്താനുള്ള ഇറാഖ് സുരക്ഷാസേനയുടെ ശ്രമഫലമായി വാരാന്ത്യത്തോടെ ശക്തമായിരുന്നു. യുദ്ധസമയത്ത് ചിത്രീകരിച്ച നിലയില് ഇപ്പോള് മാധ്യമങ്ങളില് ലഭ്യമായ ദൃശ്യത്തില് മുമ്പ് പ്രൗഢിയോടെ തലയുയര്ത്തിനിന്ന ശവകുടീരം നിരപ്പാക്കപ്പെട്ട നിലയിലാണ് കാണപ്പെടുന്നത്.
കോണ്ക്രീറ്റ് കഷണങ്ങളുടെ കൂട്ടവും മുമ്പ് മേല്ക്കൂരയെ താങ്ങിനിര്ത്തിയ സ്തംഭങ്ങളുമാണ് ഇപ്പോള് കുടീരത്തിന്റെ സ്ഥാനത്ത് അവശേഷിക്കുന്നത്. കഴിഞ്ഞ ജൂണ് മുതല് തിക്രിത് നിയന്ത്രണത്തിലാക്കിയ ഐസിസ് ഇറാഖിന്റെ രണ്ടാമത്തെ പ്രധാന നഗരമായ മൊസൂള് കൈവശപ്പെടുത്തിയ സമയത്ത് നടത്തിയ കടന്നാക്രമണങ്ങള്ക്കിടയിലാണ് കുടീരം നശിപ്പിക്കപ്പെട്ടതെന്ന് കരുതുന്നു.
കഴിഞ്ഞ ആഗസ്തില് ശവകുടീരം പൂര്ണമായും തകര്ത്തതായി ഐസിസ് അവകാശവാദം ഉന്നയിച്ചിരുന്നെങ്കിലും അത് നിസാരമായ കേടുപാടുകളോടെ ചെറുതായി കുഴിച്ചു മറിക്കപ്പെടുകയായിരുന്നെന്ന് പ്രാദേശിക ഉദ്യോഗസ്ഥര് സ്ഥിരീകരിച്ചിരുന്നു. 2003ല് യു.എസ് സൈന്യത്തിന്റെ പിടിയിലായ സദാം 2006 ഡിസംബറിലായിരുന്നു വധിക്കപ്പെട്ടത്. ഷിയാകളെയും കുര്ദ്ദുകളെയും കൂട്ടക്കൊല നടത്തിയ ഇദ്ദേഹത്തിന്റെ മനുഷ്യത്വരഹിതമായ കുറ്റകൃത്യങ്ങള് കണക്കിലെടുത്ത് വധശിക്ഷ വിധിക്കുകയായിരുന്നു.
സദാമിന്റെ ചിത്രങ്ങള് പതിക്കപ്പെട്ട കുടീരത്തില് ഇപ്പോള് ഷിയ പോരാളികളുടെ പതാകയും സുന്നി വിഭാഗങ്ങളുടെ തലവനായ മേജര് ജനറല് ഖ്വാസം സൊലൈമാനിയടക്കമുള്ള സൈന്യത്തലവന്മാരുടെ ചിത്രങ്ങളുമാണ് കാണപ്പെടുത്തത്. അഷ്ടഭുജ ആകൃതിയിലുള്ള മാര്ബിള് കേന്ദ്രീകൃതമായി ചുറ്റുമായി പൂക്കളാല് മൂടപ്പെട്ട രീതിയിലായിരുന്നു കുടീരത്തില് അദ്ദേഹത്തിന്റെ മൃതശരീരം അടക്കം ചെയ്തത്. എന്നാല് യുദ്ധത്തിനിടയില് നശിപ്പിക്കപ്പെടാനുള്ള സാധ്യത മുന്നില് കണ്ട് കഴിഞ്ഞ വര്ഷം തന്നെ അദ്ദേഹത്തിന്റെ അനുകൂലികള് മൃതദേഹം നീക്കം ചെയ്തതായി ചില മാധ്യമങ്ങള് റിപ്പോര്ട്ട് ചെയ്തിട്ടുണ്ട്.
രണ്ടു ദിവസത്തിനുള്ളില് തിക്രിതിന്റെ കേന്ദ്രമേഖലയില് എത്തിച്ചേരുമെന്ന് കഴിഞ്ഞ ദിവസം ഇറാഖ് സേന അറിയിച്ചിരുന്നു. ഐസിസ് തീവ്രവാദികള് കുടീരത്തിനു ചുറ്റും ബോംബുകളൊരുക്കി കെണി തയ്യാറാക്കിയിരിക്കാനുള്ള സാധ്യത തള്ളിഖളയുന്നില്ലെന്ന് ഷിയാ സൈന്യത്തിന്റെ ഉദ്യോഗസ്ഥനായ യാസര് നുമാ അറിയിച്ചു.
