341. ത്രിനേത്രാഭൂഷിതമുഖീ – മൂന്നു കണ്ണുകള്കൊണ്ട് അലങ്കരിപ്പെട്ട മുഖമുള്ളവള്.
342. കാളരാത്ര്യാദിദിര്വൃതാ – കാളരാത്രി തുടങ്ങിയ ശക്തികളാല് ചുറ്റപ്പെട്ടവള്.
343. ശ്രീമദ് വീരേന്ദ്രസംപൂജ്യാ – ശ്രീമാന്മാരായ വീരനാലും ഇന്ദ്രനാലും പൂജിക്കപ്പെടുന്നവള്. വീരന് എന്ന പദത്തിന് അഗ്നി, വിഷ്ണു, ഭീഷ്മര്, വീരഭദ്രന് എന്നീ അര്ത്ഥങ്ങള് ഇവിടെ യോജിക്കും. ഇന്ദ്രന് ദേവരാജന്.
അയോധന വിദഗ്ദ്ധന്, ധൈര്യശാലി, പരാക്രമി എന്നീ അര്ത്ഥങ്ങളും വീരശബ്ദത്തിനുണ്ട്. അങ്ങനെയുള്ളവരാല് പൂജിക്കപ്പെടുന്നവള് എന്നും വ്യാഖ്യാനിക്കാം.
344. രാകിണീരൂപധാരിണീ- രാകിണി എന്ന ദേവിയുടെ രൂപം ധരിച്ചവള്.
മണിപൂരത്തിനുമുകളില് ഹൃദയസ്ഥാനത്ത് പന്ത്രണ്ടു ദളങ്ങളുള്ള അനാഹതപദ്മം സ്ഥിതിചെയ്യുന്നു. അതിന്റെ കര്ണികയില് ദംഷ്ട്രകളുള്ള രണ്ടു മുഖങ്ങളുള്ളവളും ശ്യാമവര്ണ്ണയും ചക്രായുധം, ത്രിശൂലം, കപാലം, ഡമരുകം എന്നിവ കൈകളില് ധരിക്കുന്നവളും പിണ്ഡാണ്ഡത്തിലെ രക്തം എന്ന ധാതുവില് വ്യാപിച്ചവളും മുഖങ്ങളില് മൂന്നു കണ്ണുകള്വീതം ഉള്ളവളും കാളരാത്രി തുടങ്ങിയ ശക്തികളാല് സേവിക്കപ്പെടുന്നവളും വീരന്മാരാലും ഇന്ദ്രനാലും സേവിക്കപ്പെടുന്നവളുമായി മൂകാംഹിക രാകിണി എന്നു ദേവിയുടെ രൂപത്തില് സ്ഥിതിചെയ്യുന്നു. രാകിണീ ധ്യാനം-
”ഹൃത്പദ്മേ ഭാനുപത്രേ ദ്വിവദനലസിതാം ദംഷ്ടിണീ ശ്യാമവര്ണാം
അക്ഷം ശൂലം കപാലം ഡമരുമപി ഭുജൈര് ധാരയന്തീം ത്രിനേത്രാം
രക്തസ്ഥാം കാളരാത്രി പ്രഭൃതി പരിവൃതാം സ്റ്റിഗ്ധഭക്തൈകസക്താം
ശ്രീമദ് വീരേന്ദ്രവന്ദ്യാ മഭിമതഫലദാം രാകിണീം ഭാവയാമി”
… തുടരും
