വിക്ടോറിയ: പോയവര്ഷം സെപ്തംബറില് അമേരിക്കന് നഗരമായ ന്യൂയോര്ക്കിലെ മാഡിസണ് സ്ക്വയര് ഭാരത പ്രധാനമന്ത്രി നരേന്ദ്ര മോദിക്ക് ഒരുക്കിയ പ്രോജ്ജ്വല സ്വീകരണത്തിന്റെ ദൃശ്യങ്ങള് ആരുടെയും കണ്ണില്നിന്ന് മായില്ല. സീഷെല്സ് സന്ദര്ശനവേളയില് പ്രധാനമന്ത്രിക്ക് ആ രാജ്യത്തിന്റെ തലസ്ഥാനമായ വിക്ടോറിയ നല്കിയ വരവേല്പ്പും അതിനു സമാനം.
പൊതുവേദിയിലെത്തിയ മോദിയെ ആയിരക്കണക്കിന് പ്രവാസി ഭാരതീയര് കരഘോഷങ്ങളോടെയും ആര്പ്പുവിളികളോടെയുമാണ് സ്വീകരിച്ചത്. നരേന്ദ്ര മോദി വിളിയും വന്ദേമാതരവും നിലയ്ക്കാതെ മുഴങ്ങിക്കേട്ടു. അഭിമാനവും ആവേശവും നിറയ്ക്കുന്ന വാക്കുകളിലൂടെ 3500 ലധികം വരുന്ന പ്രവാസി ഭാരതീയരെ നരേന്ദ്ര മോദി അക്ഷരാര്ത്ഥത്തില് കീഴടക്കി.
പ്രകൃതി നമ്മളെ വേര്തിരിച്ചിരിക്കാം. എന്നാല് പരസ്പ്പരം ബന്ധപ്പെട്ടിരിക്കുന്ന നമ്മുടെ ഹൃദയങ്ങളെ പിരിക്കാന് അതിനൊരിക്കലും സാധിക്കില്ല. ആയിരക്കണക്കിന് വര്ഷങ്ങള്ക്ക് മുന്പ് ഭാരതവും സീഷെല്സും ഒരു മണ്ണിന്റെ ഭാഗമായിരുന്നെന്ന് ശാസ്ത്രം പറയുന്നു. ലോകം ഒരു കുടുംബമാണെന്ന് ഞാന് വിശ്വസിക്കുന്നു. ആ ധാരണയില് വളര്ന്ന ഒരു ജനതയെയും ഭൂമിശാസ്ത്രപരമായ അതിരുകള്ക്ക് വേര്തിരിക്കാനാവില്ല, നിലയ്ക്കാത്ത കരഘോഷങ്ങള്ക്കിടെ പ്രധാനമന്ത്രി പറഞ്ഞു.
ഇന്ത്യന് മഹാസമുദ്രം നമ്മളെ വിഭജിക്കുകയല്ല ഒരുമിപ്പിക്കുകയാണ് ചെയ്യുന്നത്. അവിടേയ്ക്കു വിരല്ചൂണ്ടി നിങ്ങള്ക്കു പറയാം ‘അതാണെന്റെ ഭുജ്… അതാണെന്റെ ചെന്നൈ’ ഇരുരാജ്യങ്ങളും തമ്മിലെ സാംസ്കാരിക ബന്ധം അടിവരയിട്ടുകൊണ്ട് മോദി വ്യക്തമാക്കി.
ഭാരത ജനസമൂഹം സീഷെല്സിന്റെ കാര്യശേഷിക്കും അഭിവൃദ്ധിക്കുമെല്ലാം ഏറെ സംഭാവനകള് നല്കി. നിങ്ങളില് ഞങ്ങള് അഭിമാനിക്കുന്നു. ഉണര്ന്നെണീറ്റശേഷം പാദം മണ്ണില്തൊടുന്നതിന് മാതൃരാജ്യത്തോട് ക്ഷമചോദിക്കുന്ന കുട്ടികളുടെ നാടാണ് ഭാരതം. മുപ്പതു വര്ഷത്തിനുശേഷം ഭൂരിപക്ഷമുള്ള സര്ക്കാരിനെ തെരഞ്ഞെടുക്കാന് രാഷ്ട്രത്തിനു സാധിച്ചു. അതു ചരിത്രപരവും അഭിമാനകരവുമായ കാര്യം. ഭാരതത്തിലെ തെരഞ്ഞെടുപ്പ് ഫലം സീഷെല്സും ആഘോഷിച്ചെന്നറിയുന്നതില് ഏറെ സന്തോഷം. ഭാരതത്തിന്റെ പുരോഗതി പ്രധാനം. പിന്തള്ളപ്പെട്ടാല്, ലോകത്തിന്റെ ആവശ്യങ്ങള് പൂര്ത്തീകരിക്കുന്നതിനുള്ള സംഭാവനകള് നല്കാന് നമുക്കാവില്ല.
സീഷെല്സ് ജനതയെ ഭാരതത്തിന്റെ സ്വന്തമായി തോന്നുന്നു.നിങ്ങളുടെ സ്നേഹം എന്നെ ആഴത്തില് സ്പര്ശിച്ചു. തീരദേശത്തെ സുഹൃത്തായി മാത്രമല്ല സീഷെല്സിനെ ഭാരതം കാണുന്നത്, വിശ്വസ്തനായ കൂട്ടുകാരനായും ഏറ്റവും അടുത്ത പങ്കാളിയുമായാണ്. രണ്ടു രാജ്യങ്ങളും തമ്മിലെ പരസ്പ്പരം വിശ്വാസവും സഹകരണവും വര്ധിപ്പിക്കാന് തന്റെ സന്ദര്ശനം സഹായിച്ചെന്നും മോദി വിലയിരുത്തി. ത്രിരാഷ്ട്ര പര്യടനത്തിന്റെ ഭാഗമയുള്ള സീഷെല്സ് സന്ദര്ശനം പൂര്ത്തിയാക്കിയ പ്രധാനമന്ത്രി ഇന്നലെ മൗറീഷ്യസിലെത്തി. അതിനുശേഷം അദ്ദേഹം ശ്രീലങ്കയും സന്ദര്ശിക്കും.
