മെല്‍ബണ്‍: ഇന്ത്യന്‍ വംശജ ഓസ്‌ട്രേലിയയില്‍ അജ്‌ഞാതരുടെ കുത്തേറ്റു മരിച്ചു. ഐടി കണ്‍സള്‍ട്ടന്റായ പ്രഭ അരുണ്‍ കുമാര്‍(41) ആണ് ദാരുണമായി കൊല്ലപ്പെട്ടത്‌. വെസ്‌റ്റ്‌മീഡില്‍ ഇവര്‍ താമസിച്ചിരുന്ന വീടിന്‌ 300 മീറ്റര്‍ അകലെയാണു സംഭവം നടന്നത്‌.
രാത്രി വൈകി ജോലിസ്‌ഥലത്തുനിന്ന്‌ വീട്ടിലേക്കു മടങ്ങിയ ഇവരെ വഴിയാത്രക്കാരാണു കുത്തേറ്റ് രക്‌തത്തില്‍കുളിച്ചുകിടക്കുന്ന നിലയില്‍ കണ്ടെത്തിയത്‌. തനിക്ക് കുത്തേറ്റകാര്യം വീട്ടിലുള്ളവരോട് പ്രഭ പറഞ്ഞിരുന്നു. ഉടന്‍ ആംബുലന്‍സുമായി സ്ഥലത്തെത്തിയ ബന്ധുക്കളും പോലീസും പ്രഭയെ അടുത്തുള്ള ആശുപത്രിയില്‍ എത്തിച്ചെങ്കിലും ജീവന്‍ രക്ഷിക്കാനായില്ല. മാരകമായ കുത്തേറ്റ് രക്തം വാര്‍ന്നാണ് യുവതി മരിച്ചതെന്ന് ഡോക്ടര്‍മാര്‍ പറഞ്ഞു.
പണം ആവശ്യപ്പെട്ട് സമീപിച്ച അക്രമിസംഘം പ്രഭയെ കുത്തി മുറിവേല്‍പ്പിച്ചതാണെന്നാണു സംശയിക്കുന്നതെന്നും അന്വേഷണം ആരംഭിച്ചിട്ടുണ്ടെന്നും പരമറ്റ പോലീസ് സൂപ്രണ്ട്‌ വെയ്‌ന്‍ കോക്‌സ്‌ പറഞ്ഞു. കൊലപാതകിയെ കണ്ടെത്താന്‍ പ്രത്യേക ഡിറ്റക്ടീവ് സംഘത്തെ നിയോഗിച്ചതായി പോലീസ് ഓഫീസര്‍ അറിയിച്ചു.
വീട്ടിലേക്ക് നടന്നു പോകാനുള്ള ദൂരം മാത്രമേ ഉള്ളൂ എന്നതിനാല്‍ രാത്രിയിലും പ്രഭ പലപ്പോഴും ഇതുവഴി സഞ്ചരിക്കാറുണ്ടായിരുന്നു. എന്നാല്‍, അക്രമത്തിന് കുപ്രസിദ്ധിയാര്‍ജ്ജിച്ച സ്ഥലത്തുകൂടെയുള്ള യാത്ര ഒഴിവാക്കണമെന്ന് താന്‍ പലപ്പോഴും ഉപദേശിച്ചിരുന്നതായി പ്രഭയുടെ ഒരു സുഹൃത്ത് പറഞ്ഞു.
പണം ആവശ്യപ്പെട്ട് പ്രദേശത്ത് യാത്രക്കാരെ ഭീഷണിപ്പെടുത്തുക പതിവാണെന്ന് സ്ഥലവാസി പറഞ്ഞു.
