പാരീസ്: പാരീസില് അനധികൃതമായി ആളില്ലാ വിമാനമായ ഡ്രോണ് പറത്തിയതിന് അല് ജസീറയിലെ മൂന്നു മാധ്യമപ്രവര്ത്തകരെ അറസ്റ്റ് ചെയ്തു. 70, 54, 36 വയസ് പ്രായമുള്ളവരാണ് പിടിയിലായത്. ഈഫല് ടവറിനും പാരീസിലെ മറ്റ് പ്രമുഖ പ്രദേശങ്ങള്ക്കും മുകളിലൂടെ വ്യാഴാഴ്ച പുലര്ച്ചെയാണ് ഡ്രോണ് പറന്നിരുന്നത്.
എന്തിന് വേണ്ടിയാണ് ഇവര് ഡ്രോണ് പറത്തിയതെന്ന കാര്യം വ്യക്തമല്ലെന്ന് പാരീസ് പ്രോസിക്യൂട്ടറിന്റെ വക്താവ് ആഗ്നസ് തിബോര്ട്ട് ലെക്വിരി പറഞ്ഞു. അടുത്തിടെയായി പാരീസിലെ ആകാശത്ത് തിരിച്ചറിയാനാകാത്ത പറക്കല് ഉപകരണങ്ങള് കണ്ടെത്തുന്നത് പതിവായതോടെ പോലീസ് അന്വേഷണം ഊര്ജ്ജിതമാക്കിയ സാഹചര്യത്തിലാണ് പുതിയ സംഭവം.
ഫ്രാന്സില് ലൈസന്സില്ലാത്ത ഡ്രോണ് പറത്തുന്നത് നിയമവിരുദ്ധമാണ്. കുറ്റം തെളിഞ്ഞാല് ഇവര്ക്ക് ഒരു വര്ഷം തടവും 75,000 യൂറോ പിഴയും ഈടാക്കിയേക്കും.
