ആലപ്പുഴ: മോഷ്ടിച്ച ബൈക്കില്‍ കറങ്ങി നടന്ന് മോഷണം പതിവാക്കിയ രണ്ടംഗ സംഘം പോലീസ് പിടിയിലായി. ആശ്രമം വാര്‍ഡ് എല്‍ കെ കമ്പി ഹൗസില്‍ സുരാജ് (22), തത്തംപള്ളി പതിനെട്ടില്‍ചിറ വീട്ടില്‍ വര്‍ഗീസ് (20) എന്നിവരെയാണ് സൗത്ത് എസ്‌ഐയുടെ നേതൃത്വത്തില്‍ പോലീസ് പിടികൂടിയത്. അമ്പലപ്പുഴ കോടതിയില്‍ ഹാജരാക്കിയ പ്രതികളെ റിമാന്‍ഡ് ചെയ്തു.
കഴിഞ്ഞ ദിവസം രണ്ട് മണിയോടെ പുലയന്‍വഴി ജങ്ഷന് സമീപം പട്രോളിങ് നടത്തുകയായിരുന്ന പോലീസ് സംശയകരമായി കണ്ട ഇവരുടെ ബൈക്കിന് കൈ കാണിച്ചെങ്കിലും നിര്‍ത്താതെ പോകുകയായിരുന്നു. തുടര്‍ന്ന് ജീപ്പില്‍ പിന്തുടര്‍ന്ന ഇവരെ കറുക ജങ്ഷനില്‍ നിന്ന് പോലീസ് പിടികൂടി. ചോദ്യം ചെയ്യലില്‍ ഇരുവരും സഞ്ചരിച്ചിരുന്ന ബൈക്ക് ജനറല്‍ ആശുപത്രി വളപ്പില്‍ നിന്ന് മോഷ്ടിച്ചതാണെന്ന് സമ്മതിച്ചു. സ്‌റ്റേഡിയം വാര്‍ഡ് നയാഫ് മന്‍സിലില്‍ നവാസിന്റെ ഉടമസ്ഥതയിലുള്ളതാണ് ബൈക്ക്. പിന്നീട് സ്‌റ്റേഷനിലെത്തിച്ച് വിശദമായ ചോദ്യം ചെയ്യലിലാണ് ഇവരുടെ കൂടുതല്‍ മോഷണ കഥകള്‍ പുറത്ത് വന്നത്.
പിച്ചു അയ്യര്‍ ജങ്ഷന് സമീപത്തെ വീട്ടില്‍ പാര്‍ക്ക് ചെയ്തിരുന്ന ബൈക്ക് മോഷ്ടിച്ച സംഘം പെട്രോള്‍ തീര്‍ന്നതിനെ തുടര്‍ന്ന് റെയില്‍വേ സ്‌റ്റേഷന്‍ പരിസരത്ത് ഉപേക്ഷിച്ചതായി പോലീസിനോട് സമ്മതിച്ചു. കൂടാതെ കളര്‍കോട് ജങ്ഷന് സമീപത്തെ മൊബൈല്‍ ഷോപ്പ് കുത്തിത്തുറന്ന് വിവിധ കമ്പനികളുടെ ആറ് മൊബൈലുകളും സംഘം മോഷ്ടിച്ചതായി പോലീസിനോട് സമ്മതിച്ചു. ഇതില്‍ നാലെണ്ണം സംഘത്തില്‍ നിന്ന് പോലീസ് പിടികൂടി.
