കൊല്ലം: മന്ത്രി ഷിബുബേബി ജോണിന്റെ പേരില് പാര്ട്ടിയുടെ പ്രാദേശികനേതാക്കള് തന്നെയും കുടുംബത്തെയും സമൂഹമധ്യത്തില് അവഹേളിക്കുകയാണെന്ന് പ്രവാസി വനിതയുടെ പരാതി.
നീണ്ടകര നീലേശ്വരം തോപ്പ് നിവാസിയായ നിര്മ്മലയാണ് സ്ഥലത്തെ ആര്എസ്പി നേതാക്കളായ ജോണ് ക്രിസ്റ്റഫറിനും ബ്രിട്ടോ തോമസിനുമെതിരെ രംഗത്തുവന്നിരിക്കുന്നത്.
തന്റെ 20 സെന്റ് സ്ഥലം കൈപ്പിടിയിലാക്കാനുള്ള തന്ത്രത്തിന്റെ ഭാഗമായി തന്നെയും കുടുംബത്തെയും അപകീര്ത്തിപ്പെടുത്തി പോലീസിന്റെ വലയത്തില് അക്രമിച്ച് അപമാനിക്കുകയാണെന്ന് നിര്മ്മല പറഞ്ഞു. നിര്മ്മലയുടെ മാതാവ് ഉദയ (48) മാത്രമാണ് വീട്ടില് താമസം. നിര്മ്മലയും പിതാവും സഹോദരങ്ങളും ഗള്ഫില് ജോലി ചെയ്യുകയാണ്. തങ്ങളുടെ അഭാവത്തിലും ഇപ്പോള് തങ്ങളുടെ സാന്നിധ്യത്തിലും അക്രമികള് ജീവിക്കാന് അനുവദിക്കാത്ത സാഹചര്യമാണ് നാട്ടില് സൃഷ്ടിച്ചിരിക്കുന്നതെന്നും ബന്ധപ്പെട്ട പോലീസ് അധികാരികളില് നിന്നും നീതി ലഭ്യമാക്കണമെന്നും നിര്മ്മല വാര്ത്താസമ്മേളനത്തില് ആവശ്യപ്പെട്ടു.
12ന് രാത്രി മര്ദ്ദനത്തില് പരിക്കേറ്റ നിര്മ്മലയും കുടുംബാംഗങ്ങളും കൊല്ലത്തെ സ്വകാര്യ ആശുപത്രിയില് ചികിത്സയിലാണ്. തങ്ങളെ ഇനി നാട്ടില് കാലുകുത്താന് അനുവദിക്കില്ലെന്നാണ് സ്ത്രീകളടക്കമുള്ള അക്രമികളുടെ വെല്ലുവിളിയെന്നും നിര്മ്മല ചൂണ്ടിക്കാട്ടി.
