സ്വധര്മ്മതത്വം, ജീവിതപവിത്രത, ആത്മാവിന്റെ ദിവത്വം സകലജീവജാലങ്ങളെക്കുറിച്ചുള്ള ഏകത്വബോധം ഇവ ആദ്ധ്യാത്മികതയെ സംബന്ധിക്കുന്ന മഹത്തായ നാല് ഘടകങ്ങളാണ്. ഇവ നാലും ആത്മാര്ത്ഥമായ ശ്രദ്ധയ്ക്ക് വിഷയീഭവിക്കണം. സത്യാനേ്വഷണനിരതമായ നിങ്ങളുടെ ജീവിതത്തിന് അവ ഉത്തേജനം നല്കുകയും വേണം.
കര്മ്മാചരണത്തിനുള്ള ഉത്തേജനംധര്മ്മബോധത്തില് നിന്നു നേടണം. ധര്മ്മനിഷ്ടനാകുന്നതോടുകൂടി നിങ്ങള് ആന്തരികമായ മനശ്ശാന്തിയും കണ്ടെത്തുന്നു. നിര്മ്മലമായ മനസ്സാക്ഷിയെ വികസിപ്പിച്ചെടുക്കുന്നു. അദ്ധ്യാത്മികപഥത്തിലുള്ള നിങ്ങളുടെ പുരോഗതി ത്വരിതപ്പെടുന്നു. നിങ്ങള്ക്ക് നിങ്ങളുടെ തന്നെ ഓജസ്സിനെ, ക്രിയാത്മകമായ കഴിവുകളെ, യോഗസാമര്ത്ഥ്യത്തെ തത്വചിന്താപരമായ നിസ്സംഗത്വത്തെ ആശ്രയിക്കാന് കഴിയുന്നു.
പല കൊല്ലത്തെ പരിശീലനംകൊണ്ട് പരിപുഷ്ടമാക്കട്ടെ കായിക സ്ഥലത്തോടുകൂടിയ ഒരു മല്ലയുദ്ധപ്രവീണന് തന്റെ മുറിക്കുള്ളില് സ്വസ്ഥനായിരിക്കുകയാണെങ്കില് തന്റെ കഴിവു സാമര്ത്ഥ്യവും പരീക്ഷിക്കപ്പെടാനോ അനുഭവിക്കാനോ സന്ദര്ഭം കിട്ടുകയില്ല.
മറ്റൊരു കായികാഭ്യാസി വന്ന് വെല്ലുവിളിക്കട്ടെ. അപ്പോള് മാത്രമാണ് ഒരു രാക്ഷസന്റെ ശക്തിയോടെ പ്രതിയോഗിയെ ഏറ്റുമുട്ടാന് അയാള്ക്ക് അവസരം ലഭിക്കുന്നത്. അതുപോലെ ഗുഹാന്തര്ഭാഗത്ത് കഴിയുന്ന താപസന് തന്റെ ജ്ഞാനവും തപഃശക്തിയും പരീക്ഷിക്കപ്പെടാന് അവസരമില്ല. എന്നാല് പ്രശ്നങ്ങളും വെല്ലുവിളികളും നിറഞ്ഞ ലോകജീവിതം നിങ്ങളുടെ വിശ്വാസത്തേയും ആദ്ധ്യാത്മികശക്തിയേയും പരീക്ഷിക്കാന് വേണ്ടുവോളം സന്ദര്ഭങ്ങള് നല്കും. ധാര്മ്മികമേന്മയില് വികസിക്കാനുള്ള അവസരങ്ങളും സമ്മാനിക്കും.
അനാരോഗ്യം, മനശ്ചാഞ്ചല്യം, വിശ്വാസരാഹിത്യം, ധര്മ്മപഥത്തില് നിന്നുള്ള വ്യതിയാനം ഇവയാണ് ആധുനിക സമൂഹത്തിന്റെ നാല് ശാപങ്ങള്. ഈ ശാപങ്ങള് കാരണം ഈശ്വരസാക്ഷാത്കാരം അത്യന്തം ദുഷ്കരമായി ഭവിച്ചിരിക്കുന്നു. ആരോഗദൃഢമായ ശരീരവും സുശിക്ഷിതമായ മനസ്സും ഈശ്വരനില് സുസ്ഥിരമായ വിശ്വാസവും ധര്മ്മനിഷ്ഠാനിരതമായ സ്വാഭാവും ഉണ്ടായിരിക്കണം.
മനസ്സ് മനസ്സല്ലാതാകുന്ന അവസ്ഥയാണ് പരിശുദ്ധിയുടെ പരമകാഷ്ഠ. അതായത് മനസ്സ് ശുദ്ധസത്വത്തിന്റെ നില ആര്ജ്ജിക്കുന്ന അവസ്ഥ. ശുദ്ധസത്വത്തിന്റെ മേഖലയില് എത്തുമ്പോള് മാത്രമാണ് ഒരാള്ക്ക് പരമഭക്തിയും പരമജ്ഞാനവും ഈശ്വരനോടുള്ള പരമോല്കൃഷ്ടഭാവങ്ങളും ഉദിക്കുന്നത്. ഇവ മൂന്നും ഒരാളില് സംയോജിക്കുമ്പോള് അയാള് ഈശ്വരനുമായി താദാത്മ്യം പ്രാപിക്കുന്നു.
ശ്രീ രമാദേവി
