189. നിജഫാലതലോദ്ഭൂതകാളീദേവീ നമസ്കൃതാഃ – തന്റെ നെറ്റിത്തടത്തില്നിന്നുണ്ടായ കാളീദേവിയാല് നമസ്ക്കരിക്കപ്പെട്ടവള്.
ധൂമലോചനനും സൈന്യവും നശിച്ചതറിഞ്ഞ് സുംഭന് കോപിച്ചു. ദേവിയെ പിടിച്ചുകൊണ്ടുവരികയോവധിക്കുകയോ ചെയ്യാനായി ചണ്ഡനെയും മുണ്ഡനെയും ബുദ്ധന് നിയോഗിച്ചു. ചണ്ഡമുണ്ഡന്മാര് അസുരസേനയോടൊപ്പം ദേവിയെ ആക്രമിച്ചപ്പോള് ദേവി കോപിച്ചു.
കോപംകൊണ്ടു ദേവിയുടെ മുഖം കറുത്തു. പുരികക്കൊടികള് വളഞ്ഞു. കോപംകൊണ്ടു ജ്വലിച്ച ദേവിയുടെ നെറ്റിത്തടത്തില് നിന്നു കരാളവദനയായ കാളി ഉണ്ടായി.
വിചിത്രമായ ആയുധങ്ങള് ധരിച്ചവളും നരശിരസ്സുകള്കൊണ്ടുള്ള മാലയണിഞ്ഞവളും മാംസളമല്ലാത്ത ഉടലുള്ളവളും അതിഭീകരമായ രൂപമുള്ളവളുമായ കാളി ദേവിയെ നമസ്ക്കരിച്ച് തന്റെ കര്ത്തവ്യം എന്തെന്നറിയിക്കാന് അപേക്ഷിച്ചു.
190. ചണ്ഡമുണ്ഡശിരഛേത്രീഃ – ചണ്ഡമുണ്ഡന്മാരുടെ ശിരസ്സിനെ ഛേദിച്ചവള്. (ശിരസ്സിനെ ഛേദിച്ചവള് എന്ന അര്ത്ഥത്തില്) ശിലശ്ഛേത്രീ’ എന്നാണ് പദം വേണ്ടത്. അതിന്റെ രൂപഭേദമാണു ശിരഛേത്രീ). കാളിയായി രൂപം പൂണ്ട ദേവി അസുരപ്പടയെ നശിപ്പിച്ചു. നേരിട്ടെതിര്ത്ത ചണ്ഡന്റെയും മുണ്ഡന്റെയും തലയറുത്തു ദേവിക്കു സമര്പ്പിച്ചു.
191. ചണ്ഡികാഃ – കോപിച്ചവള്. ഭയങ്കരി. ചണ്ഡന് തുടങ്ങിയ ഭയങ്കരന്മാരായ അസുരന്മാരെ വധിച്ചവളായതുകൊണ്ടു ദേവിക്കു ചണ്ഡിക എന്നു പേരുണ്ടായി എന്നും അഭിപ്രായമുണ്ട്. ഇപ്പോള് കാളി എന്നതിന്റെ പര്യായമായി അധികം പ്രയോഗം.
192. ചണ്ഡവിക്രമാഃ – ഉഗ്രവും അധ്യഷ്യവുമായ വിക്രമമുള്ളവള്. ദേവി പങ്കെടുത്തിട്ടുള്ള എല്ലാ യുദ്ധങ്ങളും ദേവിയുടെ ചണ്ഡവിക്രമത്തിന്റെ ഉദാഹരണങ്ങളാണ്.
…തുടരും
