കൊല്ലം: ചുവടുപിഴയ്ക്കാത്ത പ്രധാനമന്ത്രിയായിരുന്നു അടല്ബിഹാരി വാജ്പേയിയെന്ന് ബിജെപി ജില്ലാ പ്രസിഡന്റ് എം. സുനില്. നെഹ്റുവിനും ഇന്ദിരാഗാന്ധിക്കും ചൈനയോടുള്ള പരാജയവും അടിയന്തരാവസ്ഥയും കളങ്കമായപ്പോള് അടല്ജി പ്രകാശപൂരിതമായ ഒരു കാലഘട്ടത്തിന് നേതൃത്വം കൊടുക്കുകയായിരുന്നുവെന്ന് അദ്ദേഹം പറഞ്ഞു.
അടല്ജി ജന്മദിനാഘോഷത്തിന്റെ ഭാഗമായി ബിജെപി മെഡിക്കല് സെല് ഐഎംഎ ഹാളില് നടത്തിയ രക്തദാന പരിപാടി ഉദ്ഘാടനം ചെയ്യുകയായിരുന്നു അദ്ദേഹം. നരേന്ദ്രമോദിയെ പോലെ ഒട്ടേറെ പ്രവര്ത്തകരെ വാര്ത്തെടുത്ത് രാജ്യത്തിന് സമര്പ്പിച്ച അതുല്യ പ്രതിഭയ്ക്ക് മുന്നില് രാജ്യം സമര്പ്പിച്ച ഭാരതരത്നം ആ സമര്പ്പിത ജീവിതത്തിനുള്ള അംഗീകാരമാണെന്ന് സുനില് പറഞ്ഞു.
യോഗത്തില് ബിജെപി മെഡിക്കല് സെല് ജില്ലാ കണ്വീനര് ഡോ.സി.എസ്. സാജന് അദ്ധ്യക്ഷത വഹിച്ചു. സംസ്ഥാന കണ്വീനര് ഡോ.പി. ബിജു, ബിജെപി ജില്ലാ വൈസ്പ്രസിഡന്റ് എസ്. ദിനേശ് കുമാര്, യുവമോര്ച്ച ജില്ലാ പ്രസിഡന്റ് ആര്.എസ്. പ്രശാന്ത്, ഡോ. ശശിധരന് എന്നിവര് സംസാരിച്ചു. ഷീനാ സാജന് സ്വാഗതവും ഡോ. സഹ്യ നന്ദിയും പറഞ്ഞു.
