വിദ്യാര്ത്ഥികള് ചന്ദ്രന് പഴ്സ് കൈമാറുന്നു
അമ്പലപ്പുഴ: കളഞ്ഞുകിട്ടിയ പണമടങ്ങിയ പഴ്സ് തിരികെ ഉടമയ്ക്ക് നല്കി വിദ്യാര്ത്ഥികള് മാതൃകയായി. പുറക്കാട് എസ്എന്എം ഹയര് സെക്കന്ഡറി സ്കൂളിലെ വിദ്യാര്ത്ഥിയും കരുമാടി കണ്ണങ്കരമഠത്തില് സിദ്ധാര്ത്ഥന്റെ മകനുമായ ആദര്ശ്, അമ്പലപ്പുഴ സ്വദേശി ബാലചന്ദ്രന്റെ മകനും ആലപ്പുഴയിലെ സ്വകാര്യ ഇംഗ്ലീഷ് മീഡിയം സ്കൂളിലെ ഒമ്പതാം ക്ലാസ് വിദ്യാര്ത്ഥിയുമായ കണ്ണന് എന്നിവരാണ് പണം തിരികെ നല്കിയത്.
സുഹൃത്തുക്കളായ ഇവര് അമ്പലപ്പുഴ ശ്രീകൃഷ്ണസ്വാമി ക്ഷേത്രത്തില് പാല്പ്പായസം വാങ്ങാന് എത്തിയതായിരുന്നു. ക്ഷേത്രത്തിന്റെ വടക്കു ഭാഗത്ത് ഇവര്ക്ക് പഴ്സ് കളഞ്ഞുകിട്ടുകയായിരുന്നു. 5615 രൂപയും ലോട്ടറി ടിക്കറ്റും അടങ്ങിയ പഴ്സ് ഉടന് തന്നെ ഇവര് അമ്പലപ്പുഴ പോലീസ് സ്റ്റേഷനില് എത്തിച്ചു. ഈ സമയം പഴ്സിന്റെ ഉടമസ്ഥന് മലപ്പുറം പരപ്പനങ്ങാടി സ്വദേശി ചന്ദ്രന് പരാതി നല്കാന് സ്റ്റേഷനിലെത്തി. ശബരിമലയ്ക്ക് പോകുന്നതിനിടെ ഇദ്ദേഹത്തിന്റെ മടിയില് സൂക്ഷിച്ചിരുന്ന പഴ്സ് നഷ്ടപ്പെടുകയായിരുന്നു. പിന്നീട് സ്റ്റേഷനില് പോലീസിന്റെ സാന്നിദ്ധ്യത്തില് വിദ്യാര്ത്ഥികള് പഴ്സ് ചന്ദ്രന് കൈമാറി.
