നിന്റെ മനസ്സ് ചിന്തകളുടെ ഒരു ശേഖരമാണ്. ചിലപ്പോള് ഉടനടിയുള്ള പ്രവര്ത്തനങ്ങളെ സഹായിക്കുന്നു. മറ്റു ചിലപ്പോള് പ്രതികരണങ്ങളെ വൈകിക്കുന്നു. എല്ലാ സംഭവങ്ങളെയും രേഖപ്പെടുത്തുന്നു. സന്തോഷകരമല്ലാത്ത കാര്യങ്ങളെക്കുറിച്ച് നിന്നെ ഓര്മ്മിപ്പിക്കുന്നു.
അവയെ മറക്കാനും പൊറുക്കാനും നിന്നെ അനുവദിക്കുന്നുമില്ല. നിന്റെ പരിവര്ത്തന പ്രക്രിയ ആരംഭിക്കുവാനും അനുവദിക്കുന്നുമില്ല. ഈ ബാങ്കിലെ വരവ്ചെലവ് കണക്കുകള് അവസാനിപ്പിച്ച് നീ പുതിയ കണക്കുകള് തുടങ്ങൂ. അസുഖകരമായതെല്ലാം പിന്വലിക്കൂ. ഈശ്വരന്റെ നന്മയെക്കുറിച്ചുള്ള ചിന്തകളും വീക്ഷണങ്ങളും മാത്രം നിക്ഷേപിക്കൂ.
നീ ചെയ്യുന്ന നന്മകളെല്ലാം മറക്കൂ. മറ്റുള്ളവര് നിന്നിലേല്പ്പിച്ച വേദനകള് പൊറൂക്കൂ. ബാല്യത്തിലെ മധുരവും, പ്രേമമയവും നിര്മ്മലതയും, നിഷ്കളങ്കതയും കൊണ്ട് നിന്റെ മനസ്സ് നിറയ്ക്കൂ. ഒരു പിഞ്ചു കുഞ്ഞ് എല്ലാപേരെയും വിശ്വസിക്കുന്നു. സംരക്ഷണത്തിനുവേണ്ടി സ്വന്തം മാതാവിനെ ഉറ്റുനോക്കുന്നു. നീ ആരേയും വിധിക്കരുത്. എല്ലാപേരെയും സ്നേഹിക്കൂ. നിന്റെ വീഴ്ചകളില് നിന്നെ സംരക്ഷിക്കാന് എന്നെ അനുവദിക്കൂ.
ദിവ്യത്വത്തിന്റെ ഐശ്വര്യം തുളുമ്പുന്ന മനസ്സുകൊണ്ട് നീ നിന്നെ തന്നെ സമ്പന്നയാക്കൂ. ഈ സമ്പത്ത് അക്ഷയമാണ്. വര്ദ്ധിച്ചുകൊണ്ടേയിരിക്കുന്നു. ധനം കൊണ്ട് നിനക്ക് മനോഹരമായ ഒരു വീട് വാങ്ങാന് സാധിക്കും. പക്ഷേ പണം കൊണ്ട് എന്നെ നിന്റെ ഗൃഹത്തില് വരുത്താന് നിനക്ക് സാധിക്കില്ല. നിന്റെ മനസ്സിനെ എനിക്ക് സമര്പ്പിച്ച് പൂര്ണശരണാഗതി തേടി നിന്റെ ഹൃദയം തുറന്നാലെ ഞാന് വരികയുള്ളൂ. ഞാന് സ്വീകരിക്കുന്ന ഒരേ ഒരു പാരിതോഷികം അതുമാത്രമാണ്.
