പരീക്ഷണ സന്ദര്ഭങ്ങള് നിങ്ങള്ക്ക് ഉണ്ടാവാറില്ലേ! അപ്പോള് ശാന്തിയെ ആവാഹിച്ചെടുക്കുവാനുള്ള കഴിവ് നിങ്ങള് ആര്ജ്ജിക്കണം. പ്രാരാബ്ദങ്ങള് പ്രതികൂല്യങ്ങളെ എഴുന്നള്ളിച്ചെന്നുവരും. അപ്പോള് പ്രശാന്തചിത്തരായി കഴിയാന് സാധിക്കണം. അതാണ് നിജമായ ആത്മീയശാന്തി എന്നറിയുവിന്.
ആസുരികവൃത്തികളാകുന്ന ആണവായുധങ്ങള് നിങ്ങളെ ആക്രമിക്കുമ്പോള് ശാന്തിയുടെയും ക്ഷമയുടെയും സഹിഷ്ണതയുടെയും ധാരണയുടെയും വിവേകത്തിന്റെയും നിസ്സംഗതയുടേയും പ്രതിവിക്ഷേപങ്ങള് പ്രയോഗിച്ച് അവയെ ബലഹീനമാക്കണം. അതാണ് ആദ്ധ്യാത്മികശക്തി.
ജ്ഞാനമാണ് ഏറ്റവും ശ്രേഷ്ഠമായ സംരക്ഷണസമിതി. ജ്ഞാനം നിര്ഭയത്തെ പ്രദാനം ചെയ്യും. എല്ലാ ആസുരികശക്തികളും വാസനകളും വികാരങ്ങളും ആളിക്കത്തുന്ന ജ്ഞാനാഗ്നിയില് സമ്പൂര്ണമായി ഭസ്കീകൃതമാകും. പരമശാന്തനായ വസിഷ്ഠമഹര്ഷിയുടെ നേരെ വിശ്വാമിത്രമുനി തന്റെ അതുല്യശക്തങ്ങളായ ശരങ്ങളും മാരകായുധങ്ങളും പ്രയോഗിച്ചപ്പോള് വസിഷ്ഠന് എതിര്ത്തില്ല. അദ്ദേഹം സമഗ്ര ശാന്തനും സാത്വികനും അക്ഷോഭ്യനുമായി വര്ത്തിച്ചു.
തന്റെ ജ്ഞാനദണ്ഡ് അരികില് സ്ഥാപിച്ച ആ താപസന് നിര്ഭീതനായി ക്രോധരഹിതനായി സ്വസ്വരൂപനിഷ്ഠനായി അചഞ്ചലനായി സ്ഥിതിചെയ്തു. വിശ്വാമിത്രന്റെ എല്ലാ ആയുധശേഖരങ്ങളെയും വസിഷ്ഠന്റെ ജ്ഞാനദണ്ഡ് നിര്വീര്യമാക്കി. ആ ദണ്ഡ് മഹത്തായ ആത്മജ്ഞാനത്തിന്റെ അനശ്വര പ്രതീകമാണ്. വിശ്വാമിത്രമുനിയുടെ ആയുധങ്ങള് സ്വന്തം ചിത്തത്തില് നിന്നുദിക്കുന്ന ആസുരിക ശക്തികളെ പ്രതിനിധാനം ചെയ്യുന്നു.
നിങ്ങളുടെ ചിത്തത്തില് ആസുരിക ശക്തികളും ഈശ്വര ശക്തികളും വര്ത്തിക്കുന്നുണ്ട്. ഈശ്വരനാമജപത്തിലും ആത്മധ്യാനം കൊണ്ടും സാത്വിക ശക്തികളെ ആവാഹിക്കണം. ആ അവസ്ഥയില് മാത്രമേ ശാന്തിയും നിസ്സംഗത്വവും വൈരാഗ്യവും ലഭ്യമാകുകയുള്ളൂ. സത്വഗുണത്തില്നിന്ന് ഭക്തി ഉദിക്കുന്നു. ഫലദായകമായ ധ്യാനത്തിന്റെ ഉറവിടവും സത്വ ഗുണം തന്നെ. സത്വഗുണത്തില്നിന്ന് ജ്ഞാനവും ഉദയം ചെയ്യുന്നു.
ശ്രീ രമാദേവി
പ്രതികരിക്കാൻ ഇവിടെ എഴുതുക: