1008. ആയുരാരോഗ്യസൗഖ്യദഃ- നമുക്കു ആയുസ്സും ആരോഗ്യവും സുഖവും തരുന്നവന് എന്ന വ്യാഖ്യാനം സ്വീകരിക്കാം. തനിക്കും ലോകത്തിനും ശ്രേയസ്സും സമാധാനവും ഐശ്വര്യവും കിട്ടത്തക്കവണ്ണം ആയുസ്സും ആരോഗ്യവും ഉപയോഗിക്കാനുള്ള വിവേകവും കഴിവും അതു പ്രവര്ത്തിപ്പിക്കാനുള്ള പ്രചോദനവും നല്കുന്നവനായി ഗുരുവായൂരപ്പനെ സ്തുതിക്കാം. നാരായണീയത്തിലെ ഒടുവിലത്തെ ശ്ലോകം ഇവിടെ ഉദ്ധരിക്കുന്നതു യുക്തമാണ്.
”അജ്ഞാത്വാ തേ മഹത്ത്വം യദിഹ നിഗദിതം വിശ്വനാഥ ക മേഥാഃ
സ്തോത്രം ചൈതത് സഹസ്രോത്തരമധികതരം ത്വത്പ്രസാദായ ഭൂയാത്
ദ്വേധാ നാരായണീയം ശ്രുതിഷു ച ജനുഷാ സ്തുത്യതാവര്ണ്ണനേന
സ്ഫീതം ലീലാവതാദൈരിദമിഹ കുരതാമായുരാരോഗ്യസൗഖ്യം”
(ഗുരുവായൂരപ്പാ നിന്തിരുവടിയുടെ മഹത്വം അറിയാതെ ഇവിടെ പറഞ്ഞത് നിന്തിരുവടി ക്ഷമിക്കണേ. ആയിരത്തിലധികം ശ്ലോകങ്ങളുള്ള ഈ സ്തോത്രം ഏറ്റവുമധികം നിന്തിരുവടിയുടെ പ്രസാദത്തിനായി ഭവിക്കട്ടെ. രണ്ടുവിധത്തില് നാരായണീയമാണ് ഈ സ്തോത്രം. വേദങ്ങളില് ഉത്പന്നമായ രൂപത്താലും അവതാരലീലകളാലും സ്ഫീതമായ ഈ കൃതി ആയുരാരോഗ്യസൗഖ്യം പ്രദാനം ചെയ്യട്ടെ. (നാരായണീയം 100-11)
ഈ നാരായണീയ ശ്ലോകം ഗുരുവായൂരപ്പ സഹസ്രനാമ സ്തോത്രത്തിനു യോജിക്കും. സഹസ്രനാമകര്ത്താവും ഗുരുവായൂരപ്പന്റെ മഹത്വം അറിയാതെ ഭഗവാന്റെ നാമങ്ങള് നാരായണീയത്തില് ആയിരത്തിലധികം ശ്ലോകങ്ങളുണ്ട്. ഈ സഹസ്രനാമത്തിലും ആയിരത്തിലേറെ നാമങ്ങളുണ്ട്.
സാധാരണ സഹസ്രനാമങ്ങളില് ആയിരം നാമമേ കാണൂ. ഈ സഹസ്രനാമത്തില് ആയിരത്തിയെട്ടു നാമങ്ങളുണ്ട്. ആയിരത്തെട്ടു നാമങ്ങളുള്ള ഈ സഹസ്രനാമം നിന്തിരുവടിക്ക് ഏറ്റവുമധികം പ്രസാദത്തിനു കാരണമാകട്ടെ എന്ന് ഞാനും ഭഗവാനോടപേക്ഷിക്കുന്നു. ഈ സഹസ്രനാമം ഭഗവാന്റെ സഹസ്രോത്തരം നാമങ്ങള് ഉള്ക്കൊള്ളുന്നതുകൊണ്ടും നാരായണീയത്തില് നിന്നുണ്ടായതുകൊണ്ടും ദ്വേധാ നാരായണീയമാണ്.
വേദങ്ങളില് ഉത്പന്നമായ ആശയങ്ങളും നാരായണന്റെ ലീലാവതാരങ്ങളുമാണ് ഈ സഹസ്രനാമത്തിലുള്ളത്. നാരായണീയ സഹസ്രനാമമെന്നും മന്ത്രഘടനകൊണ്ട് രോഗഹരസഹസ്രനാമമെന്നും പ്രസിദ്ധമായ ഈ സ്തോത്രവും വ്യാഖ്യാനവും ജന്മഭൂമിപത്രത്തിനും അതിന്റെ വായനക്കാര്ക്കും ആയുരാരോഗ്യസൗഖ്യം പ്രദാനം ചെയ്യട്ടെയെന്നു ഗുരുവായൂരപ്പനോടു നേര്ന്നുകൊണ്ട് വ്യാഖ്യാനം അവസാനിപ്പിക്കുന്നു. എല്ലാവര്ക്കും മംഗളം ഭവിക്കട്ടെ.
…. അവസാനിച്ചു
