പാലാ: ശബരിമല തീര്ത്ഥാടനം തുടങ്ങുന്നതിന് മുന്നോടിയായി കടപ്പാട്ടൂര് മഹാദേവക്ഷേത്രത്തിലെ ഇടത്താവളത്തില് ഉണ്ടാകേണ്ട മുന്നൊരുക്കങ്ങള് സംബന്ധിച്ച് വിവിധ സര്ക്കാര് വകുപ്പ് ഉന്നതാധികാരികള് പങ്കെടുത്ത അവലോകന യോഗം ക്ഷേത്രത്തില് നടന്നു. ജോസ് കെ. മാണി എംപി യോഗം ഉദ്ഘാടനം ചെയ്തു. തീര്ത്ഥാടകര്ക്കും ഇടത്താവളത്തിനും ലഭിക്കേണ്ട ക്രമീകരണങ്ങളില് വീഴ്ചയുണ്ടാകരുതെന്ന് വകുപ്പു മേധാവികള്ക്ക് അദ്ദേഹം നിര്ദ്ദേശം നല്കി.
ഇടത്താവളത്തിലെത്താന് വിവിധ ഭാഷകളിലുള്ള ദിശാ സൂചികകള് പ്രധാന പാതകളിലും നഗരത്തിലെ പ്രധാന കവലകളിലും സ്ഥാപിക്കണമെന്ന് ക്ഷേത്രം സെക്രട്ടറി ആവശ്യപ്പെട്ടു. ഗതാഗത പ്രശ്നങ്ങള് ഉണ്ടാകാന് ഇടയുള്ള ഭാഗങ്ങളില് പോലീസിനെ നിയമിക്കും. ക്ഷേത്രത്തിലേക്കുള്ള റോഡുകളുടെ നവീകരണം പൂര്ത്തിയായി. ബന്ധപ്പെട്ട മറ്റ് റോഡുകളുടെ പണിയും ഈയാഴ്ച പൂര്ത്തിയാകുമെന്ന് പൊതുമരാമത്ത് എഞ്ചിനീയര് അറിയിച്ചു.
ആരോഗ്യമേഖലയില് അലോപ്പതി, ഹോമിയോപ്പതി, ആയുര്വ്വേദ ഡോക്ടര്മാരുടെ സേവനം മുന്വര്ഷങ്ങളിലേതുപോലെ ലഭ്യമാക്കാന് നടപടിയായി. അടിയന്തര സാഹചര്യമുണ്ടായാല് നേരിടുന്നതിന് ആവശ്യമായ ക്രമീകരണങ്ങള് താലൂക്ക് ആശുപത്രിയില് സജ്ജമാണെന്ന് ഡിഎംഒ അറിയിച്ചു. ശുചീകരണപ്രവര്ത്തനങ്ങള് നഗരസഭയും പഞ്ചായത്തും ചേര്ന്ന് കാര്യക്ഷമമാക്കണം. കേടായ വഴിവിളക്കുകള് മാറ്റി സ്ഥാപിക്കും.
തീര്ത്ഥാടകര്ക്ക് ക്ഷേത്രം വക സൗജന്യ അന്നദാനം എല്ലാദിവസവും ഉണ്ടാകും. മദ്യവും മയക്കുമരുന്നും ഉപയോഗിച്ച് ക്ഷേത്ര പരിസരത്തെത്തുന്ന യാചകര്, തീര്ത്ഥാടകര്ക്കൊപ്പം കഴിയുന്നത് ഒഴിവാക്കും.
ഹോട്ടലുകളിലും ഭക്ഷണസാധനങ്ങള് വില്ക്കുന്നിടങ്ങളിലും ഭക്ഷ്യസുരക്ഷാ വകുപ്പും സിവില് സപ്ലൈസ് വകുപ്പും സംയുക്തമായി പരിശോധനകള് നടത്തും. ഇടത്താവളങ്ങളിലെ ഹോട്ടലുകളില് ചായയ്ക്കും കാപ്പിക്കും ഒരു രൂപാ കൂട്ടും. മറ്റ് ഭക്ഷണങ്ങള്ക്ക് കഴിഞ്ഞ വര്ഷത്തെ നിരക്ക് തുടരും.
യോഗത്തില് ജില്ലാ പഞ്ചായത്ത് പ്രസിഡന്റ് നിര്മ്മലാ ജിമ്മി, ളാലം ബ്ലോക്ക് പഞ്ചായത്ത് പ്രസിഡന്റ് സെലിന് ഐസക്, മുത്തോലി ഗ്രാമപഞ്ചായത്ത് പ്രസിഡന്റ് ദേവസ്യ സെബാസ്റ്റ്യന്, സ്റ്റാന്ഡിങ് കമ്മറ്റി അദ്ധ്യക്ഷന് രാജന് മുണ്ടമറ്റം, പാലാ ആര്ഡിഒ സി.കെ. പ്രകാശ്, മീനച്ചില് തഹസീല്ദാര് ടി.ഡി. ഡേവിഡ്, കടപ്പാട്ടൂര് ദേവസ്വം പ്രസിഡന്റ് സി.പി. ചന്ദ്രന് നായര്, സെക്രട്ടറി കെ.ഒ. വിജയകുമാര്, വൈസ് പ്രസിഡന്റ് വി.എസ്. ഷാജികുമാര്, വിവിധ വകുപ്പുമേധാവികള് എന്നിവര് പങ്കെടുത്തു.
