ഗുവഹാത്തി: ബംഗ്ലാദേശ് ഭീകരസംഘടനയായ ജിഹാദികള് തന്നെ ആക്രമിക്കാന് ലക്ഷ്യമിടുന്നതായി ആസാം മുഖ്യമന്ത്രി തരുണ് ഗൊഗൊയ്. സംസ്ഥാന സെക്രട്ടറിയേറ്റും പ്രസിദ്ധമായ കമാഖ്യ ക്ഷേത്രവും ഇസ്ലാമിക് ഭീകരാക്രമണത്തിന് ഉന്നം വെക്കുന്നതായും ഗൊഗൊയ് വെളിപ്പെടുത്തി.
ഭീകരാക്രമണ സാദ്ധ്യതകള് കണക്കിലെടുത്ത് കമാഖ്യ ക്ഷേത്രത്തിനും സംസ്ഥാനത്തെ പ്രധാനസ്ഥലങ്ങളിലും സുരക്ഷ ശക്തമാക്കിയിട്ടുണ്ട്.
ആസാമിലെ പ്രമുഖ തീര്ത്ഥാടന കേന്ദ്രമാണ് കാമാഖ്യ ക്ഷേത്രം. ഇവിടെ പ്ലാസ്റ്റിക് വിമുക്ത ശുചീകരണ പ്രവര്ത്തനങ്ങള്ക്ക് തുടക്കം കുറിച്ചുകൊണ്ട് സംസാരിക്കവേയാണ് മുഖ്യമന്ത്രി ഗൊഗൊയ് ഇക്കാര്യം വ്യക്തമാക്കിയത്.
ആസ്സാമില് ഭീകരാക്രമണം നടത്തുമെന്ന് ഇതിനു മുമ്പ് തന്നെ ജിഹാദികള് ഭീഷണി മുഴക്കിയിരുന്നതാണ്. അതേസമയം സംസ്ഥാന പോലീസിന്റെ കസ്റ്റഡിയിലുള്ള ബംഗ്ലാദേശ് ജമാഅത്തെ ഭീകരരെ ദേശീയ അന്വേഷണ ഏജന്സിക്ക് (എന്ഐഎ) കൈമാറുന്നതാണ്. ഇത്തരം കേസുകളിലെ ബംഗ്ലാദേശ്, സൗദി അറേബ്യ എന്നീ രാജ്യങ്ങളുമായുള്ള ബന്ധത്തെപറ്റി വിശദാന്വേഷണം നടത്തുന്നതിന്റെ ഭാഗമായാണ് എന്ഐഎക്ക് കൈമാറുന്നതെന്നും ഗൊഗൊയ് കൂട്ടിച്ചേര്ത്തു.
കഴിഞ്ഞയാഴ്ച ഗൊഗൊയ് പ്രധാനമന്ത്രി നരേന്ദ്രമോദിയെ സന്ദര്ശിക്കവെ സംസ്ഥാനത്തെ ഭീകരപ്രവര്ത്തനങ്ങളെ കുറിച്ച് ചര്ച്ച നടത്തിയിരുന്നു. ഒക്ടോബര് രണ്ടിന് നടന്ന ബര്ദ്വാന് സ്ഫോടനക്കേസില് പ്രതികളായ ആറ്് ബംഗ്ലാദേശ് ജമാഅത്തെ പ്രവര്ത്തകരെ ആസാം പോലീസ് അറസ്റ്റ് ചെയ്തിരുന്നു.
ഇതിനെ തുടര്ന്ന് കേസില് അന്വേഷണം നടത്തിവരുന്ന എന്ഐഎ 12 ജിഹാദി ഭീകരരുടെ ലിസ്റ്റ് പുറത്തുവിടുകയും ചെയ്തിരുന്നു. അതിനിടെ സംസ്ഥാനത്ത് ദേശ വിരുദ്ധ പ്രവര്ത്തനങ്ങള് തടയുന്നതിനായി എല്ലാവിധത്തിലുള്ള നടപടിക്രമങ്ങളും സ്വീകരിക്കാന് നിര്ദ്ദേശം നല്കിയതായി മുഖ്യമന്ത്രിയുടെ ഓഫീസ് വൃത്തങ്ങളും അറിയിച്ചു.
