932. വികൃതി രൂപധൃക്ഃ – വ്യത്യസ്തമായ രൂപം ധരിക്കുന്നവന്. വികൃതി എന്ന പദത്തിന് സ്വാഭാവികമായ സ്ഥിതിയില്നിന്നുള്ള മാറ്റം വിലക്ഷണത, യദൃച്ഛാസംഭവം, അശുഭംഎന്നിങ്ങനെ പല അര്ത്ഥങ്ങള്.
അസാധാരണമായരൂപങ്ങള് മിക്ക അവതാരങ്ങളിലും വിഷ്ണുഭഗവാന് സ്വീകരിക്കുന്നുണ്ട്. മീനായും പന്നിയായും ആമയായും മനുഷ്യനും സിംഹവും ഒരേ ശരീരത്തില് ഒത്തുചേര്ന്ന നരസിംഹമായും എത്രയെത്ര വികൃതരൂപങ്ങള്.
മനുഷ്യരൂപത്തില് അവതരിപ്പിച്ചപ്പോഴും ആചാരവും വേഷവും വ്യത്യസ്തമായിരുന്നു. ബ്രാഹ്മണനും തപസ്വിയുമായ ജമദഗ്നിയുടെ മകനായി ജനിച്ച പരശുരാമന് മനുഷ്യരക്തംകൊണ്ടു മലിനമായ കൈക്കോടാലിയുമായി നടത്തിയ സംഹാരതാണ്ഡവം എത്ര ഭയാനകം.
സ്വന്തം അമ്മയുടെ കഴുത്തറുത്തുകൊണ്ടു തുടങ്ങിയ നരഹത്യ ഇരുപത്തിഒന്നുതവണ ക്ഷത്രിയവംശത്തെ നശിപ്പിച്ചാണ് അവസാനിപ്പിച്ചത്. കൊന്നതുകൊണ്ട് അരിശം തീരാതെ ക്ഷത്രിയരക്തം കൊണ്ട് അഞ്ചുകുളങ്ങളുണ്ടാക്കി അവയില് പിതൃതര്പ്പണം നടത്തി. സത്വഗുണമൂര്ത്തിയായ വിഷ്ണുവിന്റെ പരശുരാമാവതാരം വികൃതിരൂപധാരണമെന്നല്ലാതെ സാധൂകരിക്കാന്. ശ്രീരാമനായി അവതരിപ്പിച്ചപ്പോഴും പല പ്രവൃത്തികളും അസ്വാഭാവികമെന്നു പറയാം. സീതാപരിത്യാഗം ഉദാഹരണം.
മറ്റ് അവതാരങ്ങളിലും വികൃതി രൂപധാരണത്തിന് ഉദാഹരണങ്ങളുണ്ട്. ശ്രീകൃഷ്ണാവതാരത്തില് ജനിച്ചയുടന് പെറ്റമ്മയുടെ അടുത്തുനിന്ന് പോറ്റമ്മയുടെ മടിത്തട്ടിലേയ്ക്കുള്ള മാറ്റം ഒരുദാഹരണം. ജനിച്ച് നാലഞ്ചുദിവസങ്ങള്ക്കകം ആരംഭിച്ച അധര്മ്മികുല സംഹാരം പൂതനയില് തുടങ്ങി കുരുക്ഷേത്രയുദ്ധത്തോളം തുടരുന്നു. ബലരാമാവതാരത്തിലും അസ്വാഭാവികമായ ഇത് പല രീതിയില് പ്രകടമാകുന്നുണ്ട്. ഉദാഹരണങ്ങള് ആര്ക്കും എത്ര വേണമെങ്കിലും എടുത്തു കാട്ടാന് കഴിയും.
.. തുടരും
