ശ്രീനഗര്: ജമ്മു കാശ്മീരിലെ അതിര്ത്തിയില് വീണ്ടും പാക്കിസ്ഥാന് വെടിനിര്ത്തല് കരാര് ലംഘിച്ചു. രാംഘട്ട് മേഖലയിലെ ഇന്ത്യന് പോസ്റ്റുകള്ക്കു നേരെയാണ് ഇന്നലെ രാത്രിയില് വെടിവെയ്പ്പ് ഉണ്ടായത്.അതിനുശേഷം അര്നിയ സെക്ടറിലും വെടിവയ്പ്പുണ്ടായി. പ്രധാനമന്ത്രി നരേന്ദ്രമോദിയുടെ കാശ്മീര് സന്ദര്ശനത്തിന് മണിക്കൂറുകള്ക്ക് മുമ്പാണ് പാക് പ്രകോപനമുണ്ടായത്.
ബി.എസ്.എഫ് പോസ്റ്റുകള്ക്ക് നേരെയുണ്ടായ വെടിവയ്പ്പില് ആര്ക്കും പരിക്കുള്ളതായി റിപ്പോര്ട്ടില്ല. പാക് സൈന്യം വെടിനിറുത്തല് കരാര് തുടര്ച്ചയായി ലംഘിക്കുന്നതിനാല് ഇന്ത്യന് സൈനികരുടെ ദീപാവലി ആഘോഷങ്ങള് വേണ്ടെന്നു വച്ചു. അത്താരി അതിര്ത്തിയില് പാക് സൈനികര്ക്ക് മധുരം വിതരണം ചെയ്യുന്ന പരിപാടിയും വേണ്ടെന്നു വച്ചിട്ടുണ്ട്.
മൂന്നുദിവസത്തെ ഇടവേളയ്ക്കുശേഷം ബുധനാഴ്ചയാണ് പാക്കിസ്ഥാന്റെ ഭാഗത്തുനിന്ന് ആദ്യമായി വെടിനിര്ത്തല് ലംഘനമുണ്ടായത്. സാംബ ജില്ലയിലെ അന്താരാഷ്ട്ര അതിര്ത്തിയിലാണ് ബുധനാഴ്ച പാക്കിസ്ഥാന് കനത്തതോതില് വെടിവയ്പ് നടത്തിയത്. പാക് വെടിവയ്പിനു മറുപടിയായി ഇന്ത്യന് സേനയും ശക്തമായി തിരിച്ചടിച്ചു. ഇതിനു പിന്നാലെയാണ് ഇന്ന് വീണ്ടും വെടിവെയ്പ്പ് നടത്തിയത്.
അതേ സമയം, കാശ്മീരിലെ പ്രളയ ദുരിത പ്രദേശങ്ങളും കാന്പുകളും സന്ദര്ശിക്കാനായി പ്രധാനമന്ത്രി നരേന്ദ്ര മോദി വ്യാഴാഴ്ച സിയാചിനില് എത്തി. തന്റെ ഇത്തവണത്തെ ദീപാവലി കാഷ്മീരില് വെള്ളപ്പൊക്കത്തിന് ഇരയായവര്ക്ക് ഒപ്പമായിരിക്കുമെന്ന് പ്രധാനമന്ത്രി നേരത്തെ അറിയിച്ചിരുന്നു.
ഇന്ന് ഉച്ചയ്ക്ക് ശേഷം അദ്ദേഹം ശ്രീനഗറിലെത്തി ദുരിതബാധിത പ്രദേശങ്ങളില് സന്ദര്ശനം നടത്തും. പ്രധാനമന്ത്രിയായ ശേഷം മോദിയുടെ നാലാമത്തെ കാശ്മീര് സന്ദര്ശനമാണിത്. പ്രധാനമന്ത്രിയുടെ സന്ദര്ശനവും പാകിസ്ഥാന്റെ കരാര് ലംഘനവും കണക്കിലെടുത്ത് കാശ്മീരില് സൈന്യം കനത്ത സുരക്ഷയാണ് ഒരുക്കിയിരിക്കുന്നത്.
