ബിസിനസ്സിന്റെ നട്ടെല്ലാണ് വിശ്വാസം. വിശ്വാസമില്ലാതെ എങ്ങനെ വ്യാപാരം നടക്കും? സൃഷ്ടിയെ നിലനിര്ത്തുന്ന നിയമത്തിലുള്ള വിശ്വാസം- കര്മ്മനീതി. അവനവനിലുള്ള വിശ്വാസം. തൊഴിലില്ലായ്മക്ക് കാരണം വിദ്യാര്ത്ഥികള്ക്ക് നഷ്ടപ്പെട്ടുപോയ ആത്മവിശ്വാസമാണ്. ആത്മവിശ്വാസമില്ലെങ്കില് പ്രവര്ത്തനക്ഷമതയും ഇല്ലാതാകുന്നു. ആത്മീയതയ്ക്ക് മാത്രമേ ആത്മവിശ്വാസത്തെ പുനരുജ്ജീവിപ്പിക്കാന് കഴിയൂ. വളര്ത്താന് കഴിയൂ. നീതിബോധം സാമൂഹ്യഘടകമല്ല, അവനവനുമായും മറ്റുള്ളവരുമായുമുള്ള ബന്ധമാണ്. അത് ഒരുതരത്തില് വ്യക്തിനിഷ്ഠവുമാണ്. മറ്റൊരു തലത്തില് സമഷ്ടിയുമായി ബന്ധപ്പെട്ടതുമാണ്.ആര്ത്തി ഉപഭോക്താക്കളെ നശിപ്പിക്കുന്നു. ഒപ്പം ആത്മാവിനെയും കര്മ്മക്ഷമതയെയും നശിപ്പിക്കുന്നു. ‘ഡോക്കോമി’ന് എന്താണ് സംഭവിച്ചത്? ആര്ത്തിയാണ് അവരുടെ നാശത്തിന് കാരണം. അതുകൊണ്ടുതന്നെയാണ് ഇന്ന് വലിയ വലിയ കമ്പനികള് സാമൂഹ്യപ്രതിബദ്ധതയെക്കുറിച്ചും ധാര്മ്മികയെക്കുറിച്ചും ചിന്തിക്കാന് തുടങ്ങിയിരിക്കുന്നത്. ക്ഷിപ്ര ലാഭക്കൊതിയില്ലാതെ വിശാലമായ കാഴ്ചപ്പാടോടുകൂടി ബിസിനസ്സ് ചെയ്യുകയാണെങ്കില് നമ്മള് തെറ്റുചെയ്യുകയില്ല. ഇതിന്റെ അര്ത്ഥം ഹരിശ്ചന്ദ്രനാവുക എന്നല്ല, അല്പം യുക്തി- ഒരു നുള്ള് ഉപ്പ്, സ്വീകാര്യമാണ്. ഒരുപാട് തന്ത്രങ്ങള് മെനഞ്ഞെടുക്കുന്നത് ഗുണകരമല്ല. ഉപ്പിന്റെ അളവുകൂടുമ്പോള് ഭക്ഷണത്തിന്റെ രുചി നഷ്ടപ്പെടുന്നതുപോലെ.
പ്രപഞ്ചനിയമങ്ങളില് വിശ്വാസമുണ്ടെങ്കില് ഏത് സാഹചര്യത്തിലും ശാന്തരും സംതൃപ്തരുമായിരിക്കുവാന് സാധിക്കും. എല്ലാ കാര്യങ്ങളും യാതൊരു പ്രതിബന്ധങ്ങളുമില്ലാതെ നടക്കുന്നുവെന്ന് ബോധ്യമാകും. സംസ്കൃതത്തില് ഒരു ചൊല്ലുണ്ട്. ”പ്രവൃത്തികളുടെ വിജയത്തിനു ചുറ്റും ഹാര്മണി ഉണ്ടായിരിക്കണം. ഉപകരണത്തേക്കാള് ബാഹ്യമായ ഈ ഹാര്മണി വളരെ പ്രധാനമാണ്.എന്റെ അഭിപ്രായത്തില് വിജയമെന്നാല് വലിയ ബാങ്ക് നിക്ഷേപമുണ്ടായിരിക്കുകയും മുഖത്ത് വിഷാദവും നിരാശയും നിറഞ്ഞിരിക്കുകയും ചെയ്യുന്ന അവസ്ഥയല്ല. വിജയമെന്നാല് മുഖത്തുള്ള മായാത്ത പുഞ്ചിരി, അചഞ്ചലമായ ആത്മവിശ്വാസം എന്നിവയാണ്.
