ആലപ്പുഴ: ആറാട്ടുപുഴ മംഗലം കയര് സഹകരണസംഘം സെക്രട്ടറിയുടെ മരണവുമായി ബന്ധപ്പെട്ട് ബോര്ഡ് മെമ്പര്ക്കെതിരെ ബന്ധുക്കള് പരാതി നല്കി. തൃക്കുന്നപ്പുഴ വാഴക്കൂട്ടത്തില് ലിന്സിന്റെ ഭാര്യ അഖില (33) യെയാണ് കഴിഞ്ഞദിവസം സഹകരണ സംഘത്തില് മരിച്ചനിലയില് കണ്ടെത്തിയത്. യാതൊരുവിധ സാമ്പത്തിക ബാധ്യതകളും ഇല്ലാത്ത അഖിലയുടെ ആത്മഹത്യയില് ദുരൂഹതയുണ്ടെന്ന് വില്ലേജ് അസിസ്റ്റന്റായി ജോലി ചെയ്യുന്ന ലിന്സ് അധികൃതര്ക്ക് നല്കിയ പരാതിയില് പറയുന്നു.
മരണശേഷം അഖിലയുടെ ഡയറിക്കുറിപ്പ് പരിശോധിച്ചപ്പോഴാണ് ജോലി ചെയ്യുന്ന സ്ഥാപനത്തിലെ ബോര്ഡ് മെമ്പറുടെ സാമ്പത്തിക തട്ടിപ്പാണ് ആത്മഹത്യക്ക് കാരണമെന്ന് ബോധ്യപ്പെട്ടത്. മുന്പ് ഈ സ്ഥാപനത്തിലെ ജീവനക്കാരിയായിരുന്നു ബോര്ഡ് മെമ്പര്. ഇവര് സെക്രട്ടറിയായ അഖില അറിയാതെ ലക്ഷങ്ങളുടെ സാമ്പത്തിക തട്ടിപ്പ് നടത്തുകയായിരുന്നു. പിന്നീട് സംഭവം അറിഞ്ഞ അഖില മാനസിക പ്രയാസം മൂലം ജോലി ചെയ്യുന്ന സ്ഥാപനത്തില് തന്നെ ആത്മഹത്യ ചെയ്യുകയായിരുന്നു. സംഭവത്തെ തുടര്ന്ന് ആഭ്യന്തരമന്ത്രി, ഡിജിപി, ജില്ലാ പോലീസ് ചീഫ് തുടങ്ങിയവര്ക്ക് ലിന്സി പരാതി നല്കി. കൂടാതെ അഖിലയുടെ ഡയറിയും ജില്ലാ പോലീസ് ചീഫിന് കൈമാറി.
