പരിക്കേറ്റ അഭിദേവ്
മാവേലിക്കര: എടിഎമ്മിന്റെ വാതിലില് രണ്ടര വയസുകാരന്റെ കൈവിരല് കുടുങ്ങി. അഗ്നിശമന സേന എത്തിയാണ് രക്ഷിച്ചത്. ചാരുംമൂട് ജങ്ഷന് സമീപത്തെ ഫെഡറല് ബാങ്കിന്റെ എടിഎമ്മില് ഞായറാഴ്ച വൈകിട്ട് നാലിനാണ് സംഭവം. കരിമുളയ്ക്കല് രതീഷ്ഭവനത്തില് രതീഷ്-വിദ്യ ദമ്പതികളുടെ രണ്ടരവയസുള്ള മകന് അഭിദേവാണ് അപകടത്തില്പെട്ടത്. അമ്മയോടും സഹോദരിയോടുമൊപ്പം എടിഎമ്മില് എത്തിയ അഭിദേവിന്റെ വലതുകൈയുടെ തള്ളവിരല് വാതിലിനിടയില് കുടുങ്ങുകയായിരുന്നു. വാതില് തുറക്കാന് ശ്രമിച്ചിട്ടും സാധിക്കാതെ വന്നതോടെ കായംകുളം അഗ്നിശമനസേനയെ വിവരമറിയിച്ചു.
അസി. സ്റ്റേഷന് മാസ്റ്റര് എസ്. താഹയുടെ നേതൃത്വത്തില് എത്തിയ സംഘം ഹൈഡ്രോളിക് കട്ടര് ഉപയോഗിച്ച് വാതില്മുറിച്ച് മാറ്റിയാണ് കുട്ടിയെ രക്ഷപെടുത്തിയത്. മുക്കാല്മണിക്കൂറോളം വേദന അനുഭവിച്ച അഭിദേവിനെ അഗ്നിശമനസേനയുടെ ആംബുലന്സില് മാവേലിക്കര ജില്ലാ ആശുപത്രിയില് എത്തിച്ചു. ചതഞ്ഞ വിരല് തുന്നിക്കെട്ടിയ ശേഷം അഭിദേവിനെ വിദഗ്ധ ചികിത്സയ്ക്കായി ആലപ്പുഴ മെഡിക്കല് കോളേജ് ആശുപത്രിയിലേക്ക് മാറ്റി.
