തൊടുപുഴ : ആലക്കോട് പഞ്ചായത്തില് വര്ഷങ്ങളായി തകര്ന്നുകിടക്കുന്ന കലയന്താനി-ചിലവ്, ആലക്കോട്-ചിലവ് റോഡുകള് നന്നാക്കാന് ഇനിയും നടപടിയായില്ല. കാല്നട യാത്ര പോലും ദുഷ്കരമായ ഈ റോഡുകളില് ഇരുചക്രവാഹനങ്ങള് ഉള്പ്പെടെ അപകടത്തില്പ്പെടുന്നത് പതിവായിരിക്കുകയാണ്. നാട്ടുകാര് നിരവധി നിവേദനങ്ങളും പരാതികളും പഞ്ചായത്ത് അധികൃതര്ക്കും മറ്റും നല്കിയെങ്കിലും റോഡ് ഗതാഗത യോഗ്യമാക്കാന് നടപടികളായിട്ടില്ല.
വെള്ളിയാമറ്റം, ഹൈറേഞ്ച് മേഖലകളെ കരിമണ്ണൂര് മേഖലയുമായി ബന്ധിപ്പിക്കുന്ന പ്രധാന പാതയാണ് കലയന്താനി-ചിലവ് റോഡ്. ദിവസേന നൂറുകണക്കിന് വാഹനങ്ങളും കാല്നടയാത്രക്കാരും ഈ വഴി സഞ്ചരിക്കുന്നുണ്ട്. ഇരുവശങ്ങളും ടാറും മെറ്റലും ഇളകി താഴ്ന്നുകിടക്കുന്ന റോഡ് സൃഷ്ടിക്കുന്ന അപകട ഭീഷണി ചെറുതല്ല. എതിരെ വരുന്ന വാഹനങ്ങള്ക്ക് സൈഡ് കൊടുക്കാന് കഴിയാതെ ഇരുചക്ര വാഹനങ്ങള് അപകടത്തില്പ്പെടുന്നത് പതിവാണ്. തൊടുപുഴയില് നിന്ന് ചിലവിലേക്കുള്ള മിക്ക ബസുകളും സര്വീസ് നടത്തുന്നത് ഈ റോഡ് വഴിയാണ്. ഹൈറേഞ്ച് മേഖലയില് നിന്നുള്ളവര്ക്ക് ഉടുമ്പന്നൂര്, കരിമണ്ണൂര് പ്രദേശങ്ങളിലേക്കുള്ള എളുപ്പവഴി കൂടിയാണിത്. ഉടുമ്പന്നൂര്, കരിമണ്ണൂര് മേഖലകളിലുള്ളവര് കലയന്താനിയിലെ ആരാധനാകേന്ദ്രങ്ങളിലെത്താനും ആശ്രയിക്കുന്നത് ഈ റോഡിനെയാണ്. ചിലവ്, ഓലിക്കാമറ്റം, ഉപ്പുകുളം ഭാഗങ്ങളില് നിന്നുള്ള നിരവധി വിദ്യാര്ഥികള് ഈ റോഡ് വഴിയാണ് കലയന്താനി, പൂമാല എന്നിവിടങ്ങളിലെ സ്കൂളുകളിലെത്തുന്നത്.
കലയന്താനി മുതല് ചിലവ് വരെ രýരകിലോമീറ്റര് വരുന്ന റോഡില് ഇപ്പോള് കാല്നടയാത്ര പോലും പ്രയാസമാണ്. പൊട്ടിപ്പൊളിഞ്ഞ റോഡിന്റെ പല ഭാഗങ്ങളിലും വീതി വളരെ കുറവാണ്.
ആലക്കോട്-ചിലവ് റോഡും പൂര്ണമായി തകര്ന്നിട്ട് വര്ഷങ്ങളായി. ഈ വഴിയിലൂടെ വാഹനഗതാഗതം പൂര്ണമായും നിലച്ചിരിക്കുകയാണ്. റേഡ് നിര്മാണത്തിനായി തുക അനുവദിച്ചിരുന്നതായി പറയപ്പെടുന്നു. മെറ്റല് ഇറക്കുകയും ചെയ്തിരുന്നു. എന്നാല്, ചില കേന്ദ്രങ്ങള് നടത്തിയ ചരട് വലി മൂലം ഫണ്ട് ലഭിക്കാതെ പോകുകയായിരുന്നത്രെ. മഴ മാറുന്നതോടെ ഇരു റോഡുകളും ഗതാഗത യോഗ്യമാക്കുമെന്ന് പ്രതീക്ഷിച്ചിരുന്നെങ്കിലും അധികൃതര് തിരിഞ്ഞുനോക്കിയില്ല. റോഡിന്റെ ശോച്യാവസ്ഥ പരിഹരിക്കണമെന്നാവശ്യപ്പെട്ട് സമരത്തിനൊരുങ്ങുകയാണ് നാട്ടുകാര്.
