ക്രൂരതയും ദുഷ്ടലാക്കും

നാം ആത്മാര്‍ത്ഥമായി സ്‌നേഹിച്ചാലും തിരികെ കിട്ടാതെ പോകുന്നു സ്‌നേഹം. ആത്മാര്‍ത്ഥത തിരിച്ചറിയാഞ്ഞിട്ടല്ല. ചിലരാകട്ടെ, ദുഷ്പ്രചരണങ്ങള്‍ നടത്തുന്നതില്‍ തല്പരരാകും. ഇത്രയും ക്രൂരതയും ദുഷ്ടലക്ഷ്യവും വച്ചു പ്രവര്‍ത്തിക്കുന്നവരോട് എന്താണ് വേണ്ടത്? എങ്ങനെയാണ് ‘ ഉപാധികളില്ലാത്ത സ്‌നേഹം’ സൂക്ഷിക്കാന്‍ കഴിയുന്നത്? ഇത്തരം ഒരു അവസ്ഥയിലൂടെ കടന്നുപോകാത്തവര്‍ വിരളമായിരിക്കും. അല്ലേ?

ഈ സാഹചര്യം ഒരു വെല്ലുവിളിയായെടുക്കൂ. നിങ്ങളുടെ സ്‌നേഹം നിങ്ങളുടേതല്ലേ? അതൊരിക്കലും ഇത്തരം പ്രവണതകളില്‍ ഉലയാനിടവരരുത്. നിങ്ങളുടെ ആത്മാര്‍ത്ഥതയും സ്‌നേഹവും സ്വാഭാവികമായിത്തന്നെയിരിക്കട്ടെ. ആരോടും നീരസം വേണ്ട.

കാര്യമില്ലാതെ നീരസം ഭാവിക്കുന്നവര്‍ തെറ്റും ശരിയും വേര്‍തിരിച്ചറിയാന്‍ കഴിയാത്ത, മനസ്സോ ആത്മാവോ ഇല്ലാത്ത വെറും പഴന്തുണിപ്പാവയ്‌ക്കു തുല്യരാണെന്ന് തിരിച്ചറിയൂ. പാവം പഴന്തുണിപ്പാവയോട് പരിഭവിച്ചിട്ടോ, വിരോധം ഭാവിച്ചിട്ടോ എന്താണ് പ്രയോജനം? കരുണാപുരസ്സരം ഇങ്ങനെ സ്വയം ചിന്തിക്കൂ…. നിങ്ങളുടെ ആസ്വാസ്ഥ്യം ശമിക്കും. സ്വയം സ്വതന്ത്രനും കേന്ദ്രീകൃതനുമാകാന്‍ കഴിയും.

സ്‌നേഹം ഒരു ബിസിനസ്സ് അല്ല. ഗുരുവിന്/ ഈശ്വരന് നിങ്ങളോട് ഒത്തിരി ഒത്തിരി സ്‌നേഹമാണ്. കാരണം അവിടെ മറ്റൊരു “”Choice”ഇല്ല. സ്‌നേഹം ഒരു പ്രവൃത്തിയല്ല. ഒരവസ്ഥയാണ്. അത് സ്വാഭാവികമായി പ്രകടിപ്പിക്കാനാകണം. അല്ലെങ്കില്‍ അത് അസൂയ, അത്യാഗ്രഹം, വെറുപ്പ് തുടങ്ങിയ ദുര്‍ഗുണങ്ങളുടെ ചുവടുപിടിച്ച് ദുഷ്പ്രചരണങ്ങളിലേക്കും, ദുഷ്പ്രവൃത്തികളിലേക്കും വഴിമാറും. അത് നിങ്ങളെത്തന്നെ നിഷേധാത്മകമായി ബാധിക്കും.

നിങ്ങളോടു മാത്രമായി ഞാനൊരു രഹസ്യം പറയട്ടെ… “Evil man”(ദുഷ്ടന്‍) എന്നൊരാളില്ല. തെറ്റിദ്ധാരണകളോ, ഇടുങ്ങിയ കാഴ്ചപ്പാടുകളോ, സംഘര്‍ഷങ്ങളോ ആണ് അയാളെ ദുഷ്ടനായി പെരുമാറാന്‍ പ്രേരിതനാക്കുന്നത്. അടിസ്ഥാനപരമായി എല്ലാവരിലും നന്മയുണ്ട്. ഈശ്വരന്‍ സ്വന്തം പ്രതിച്ഛായയിലാണ് ഓരോരുത്തരെയും സൃഷ്ടിച്ചിരിക്കുന്നത്. ഈശ്വരന് ദുഷ്ടഛായയുണ്ടെന്ന് നിങ്ങള്‍ക്ക് തോന്നിയിട്ടുണ്ടോ.

നിങ്ങളെ ഏറെ വേദനിപ്പിക്കുന്ന ഒരാളെ സനേഹം കൊണ്ട് ശിക്ഷിക്കൂ. ”നിന്നെക്കൂടാതെ എനിക്കു ജീവിക്കാനാവില്ല” എന്നുപറയുന്നതല്ല സ്‌നേഹം. ജീവിതത്തിലുടനീളം സത്യസന്ധത പുലര്‍ത്തുന്നതും, Straight forward ആയി പെരുമാറുന്നതും, മനസ്സില്‍ സദ്ചിന്തകളും നന്മയും സൂക്ഷിക്കുന്നതും സ്‌നേഹമാണ്. ഇതൊക്കെ “Saintly qualities” ആണെന്ന് തോന്നുന്നുവോ?

എല്ലാവരിലും ഒരു ”’Saint” ഉണ്ട്. ഇന്നുമുതല്‍ നിങ്ങള്‍ക്ക് ശത്രുക്കളില്ല. നിങ്ങളെ സങ്കടപ്പെടുത്തുന്നവരെ നിങ്ങള്‍ സ്‌നേഹംകൊണ്ട് ശിക്ഷിക്കുകയും തിരുത്തുകയും ചെയ്യുമെന്ന് ഉറച്ച തീരുമാനമെടുക്കൂ. നിങ്ങള്‍ സ്‌നേഹത്തെ അറിയുമ്പോള്‍ അത് ഈശ്വരീയതയുടെ ആള്‍രൂപമാകുന്നു.

-ശ്രീ ശ്രീ രവിശങ്കര്‍