നാരായണമൂര്ത്തേ, ഗുരുനാരായണമൂര്ത്തേ
നാരായണമൂര്ത്തേ ഗുരുനാരായണമൂര്ത്തേ
ആരായുകിലന്ധത്വമൊഴിച്ചാദിമഹസ്സിന്
നേരാം വഴികാട്ടും ഗുരുവല്ലോ പരദൈവം
ആരാധ്യനതോര്ത്തീടുകില് ഞങ്ങള്ക്കവിടുന്നാം
നാരായണമൂര്ത്തേ, ഗുരുനാരായണമൂര്ത്തേ
അന്പാര്ന്നവരുണ്ടോ പരവിജ്ഞാനികളുണ്ടോ
വന്പാകെ വെടിഞ്ഞുള്ളവരുണ്ടോയിതുപോലെ
മുന്പായി നിനച്ചൊക്കെയിലും ഞങ്ങള് ഭജിപ്പൂ
നിന് പാവന പാദം ഗുരുനാരായണമൂര്ത്തേ
അന്യര്ക്കു ഗുണം ചെയ്വതിനായുസ്സുവപുസ്സും
ധന്യത്വമൊടങ്ങാത്മതപസ്സും ബലിചെയ്വു
സംന്യാസികളില്ലിങ്ങനെയില്ലില്ലമിയന്നോര്
വന്യാശ്രമമേലുന്നവരും ശ്രീഗുരുമൂര്ത്തേ
വാദങ്ങള് ചെവിക്കൊണ്ടു മതപ്പോരുകള് കണ്ടും
മോദസ്ഥിരനായങ്ങു വസിപ്പൂ മലപോലെ
വേദാഗമ സാരങ്ങളറിഞ്ഞങ്ങൊരുവന് താന്
ഭേദാദികള് കൈവിട്ടു ജയിപ്പൂ ഗുരുമൂര്ത്തേ
മോഹാകുലരാം ഞങ്ങളെയങ്ങേടെയടിപ്പൂ
സ്നേഹാത്മകമാം പാശമതില് കെട്ടിയിഴപ്പൂ,
ആഹാ! ബഹുലക്ഷം ജനമങ്ങേത്തിരുനാമ-
വ്യാഹാരബലത്താല് വിജയിപ്പൂ ഗുരുമൂര്ത്തേ
അങ്ങേത്തിരുവുള്ളൂറിയൊരന്പിന് വിനിയോഗം
ഞങ്ങള്ക്കു ശുഭം ചേര്ത്തിടുമീ ഞങ്ങടെ യോഗം
എങ്ങും ജനചിത്തങ്ങളിണക്കി പ്രസരിപ്പൂ
മങ്ങാതെ ചിരം നിന് പുകല്പോല് ശ്രീഗുരുമൂര്ത്തേ
നാരായണമൂര്ത്തേ, ഗുരുനാരായണമൂര്ത്തേ
നാരായണമൂര്ത്തേ പരമാചാര്യ നമസ്തേ
