ക്രിസ്റ്റിയാനോക്ക് ഹാട്രിക്ക് റയലിന് അഞ്ച് ഗോള്‍ വിജയം

മാഡ്രിഡ്: സൂപ്പര്‍താരം ക്രിസ്റ്റിയാനോ റൊണാള്‍ഡോയുടെ തകര്‍പ്പന്‍ ഹാട്രിക്കിന്റെ കരുത്തില്‍ റയല്‍ മാഡ്രിഡിന് സ്പാനിഷ് ലീഗില്‍ ഗംഭീര വിജയം. മറുപടിയില്ലാത്ത അഞ്ച് ഗോളുകള്‍ക്ക് അത്‌ലറ്റിക് ബില്‍ബാവോയെയാണ് റയല്‍ സാന്റിയാഗോ ബെര്‍ണാബ്യൂവില്‍ തകര്‍ത്തുവിട്ടത്. അവസാന നാല് കളികളില്‍ നിന്ന് മൂന്നാം തവണയാണ് റൊണാള്‍ഡോ റയലിനായി ഹാട്രിക്ക് നേടുന്നത്. 2, 55, 88 മിനിറ്റുകളിലാണ് ക്രിസ്റ്റിയാനോ എതിര്‍ വല കുലുക്കിയത്. മറ്റ് രണ്ട് ഗോളുകള്‍ ഫ്രഞ്ച് സ്‌ട്രൈക്കര്‍ കരിം ബെന്‍സേമയുടെ വകയായിരുന്നു.

റയല്‍ മാഡ്രിഡ് സമ്പൂര്‍ണ്ണ ആധിപത്യം പുലര്‍ത്തിയ കളിയില്‍ 14 ഷോട്ടുകളാണ് ബില്‍ബാവോ പോസ്റ്റിലേക്ക് അവര്‍ പറത്തിയത്. ബില്‍ബാവോയുടെ ഗോളിയുടെ മികച്ച പ്രകടനമാണ് പരാജയം അഞ്ച് ഗോളില്‍ ഒതുക്കിയത്. അതേസമയം ബില്‍ബാവോ ആറ് തവണ റയല്‍ ഗോള്‍മുഖം ലക്ഷ്യം വെച്ചെങ്കിലും ഗോളി ഇകര്‍ കസീയസിനെ കീഴടക്കാന്‍ കഴിഞ്ഞില്ല.

കളിയുടെ രണ്ടാം മിനിറ്റില്‍ തന്നെ സൂപ്പര്‍താരം ക്രിസ്റ്റിയാനോ ഗോള്‍വേട്ടക്ക് തുടക്കമിട്ടു. ഗരെത്ത് ബെയ്ല്‍ നല്‍കിയ ക്രോസ് ക്ലോസ് റേഞ്ചില്‍ നിന്ന് തകര്‍പ്പനൊരു ഹെഡ്ഡറിലൂടെ ക്രിസ്റ്റിയാനോ എതിര്‍ വല കുലുക്കി. അധികം കഴിയും മുന്നേ ക്രിസ്റ്റിയാനോയുടെ മറ്റൊരു തകര്‍പ്പന്‍ ഷോട്ട് ബില്‍ബാവോ ഗോളി കുത്തിയകറ്റി. പിന്നീട് ബില്‍ബാവോക്ക് രണ്ട് അവസരങ്ങള്‍ ലഭിച്ചെങ്കിലും ഗോളാക്കാന്‍ കഴിഞ്ഞില്ല. 41-ാം മിനിറ്റില്‍ ലീഡ് ഉയര്‍ത്തി. ലൂക്കാ മോഡ്രിച്ച് എടുത്ത കോര്‍ണര്‍ കിക്ക് നല്ലൊരു ഹെഡ്ഡറിലൂടെ കരിം ബെന്‍സേമ വലയിലെത്തിച്ചു.

പിന്നീട് കൡയുടെ 55-ാം മിനിറ്റില്‍ ക്രിസ്റ്റിയാനോ തന്റെ രണ്ടാം ഗോളും റയലിന്റെ മൂന്നാം ഗോളും സ്വന്തമാക്കി. ഗരെത്ത് ബെയ്‌ലിന്റെ പാസില്‍ നിന്നാണ് ഇത്തവണ ക്രിസ്റ്റിയാനോ നിറയൊഴിച്ചത്. പിന്നീട് 56, 60 മിനിറ്റുകളില്‍ ബെയ്ല്‍ രണ്ട് അവസരങ്ങള്‍ നഷ്ടമാക്കി. ഒടുവില്‍ 69-ാം മിനിറ്റില്‍ ക്രിസ്റ്റിയാനോയുടെ പാസില്‍ നിന്ന് ബെന്‍സേമ തന്റെ രണ്ടാമത്തെയും റയലിന്റെ നാലാം ഗോളും സ്വന്തമാക്കി.

പിന്നീട് 88-ാം മിനിറ്റില്‍ റൊണാള്‍ഡോ ഹാട്രിക്ക് തികച്ചു. പെപ്പെ എടുത്ത കോര്‍ണര്‍ കിക്കാണ് ക്രിസ്റ്റിയാനോ ബില്‍ബാവോ വലയിലെത്തിച്ചത്. ഇതോടെ റയലിന്റെ ഗോള്‍വേട്ടയും പൂര്‍ണ്ണമായി. ലാലിഗയില്‍ 22 ഹാട്രിക് എന്ന റെക്കോര്‍ഡ് നേട്ടത്തിനും ക്രിസ്റ്റിയാനോ അര്‍ഹനായി. ടെല്‍മോ സാര, ആല്‍ഫ്രഡോ ഡി സ്‌റ്റെഫാനോ എന്നവരുടെ റെക്കോര്‍ഡിനൊപ്പമാണ് ക്രിസ്റ്റിയാനോ എത്തിയത്. അവസാന നാല് മത്സരങ്ങളില്‍ മൂന്നാം തവണയാണ് ക്രിസ്റ്റിയാനോ ഹാട്രിക്ക് നേടുന്നത്. ലാ ലിഗയില്‍ ഈ സീസണില്‍ 13 ഗോളുകളാണ് ക്രിസ്റ്റിയാനോ ഇതുവരെ നേടിയിട്ടുള്ളത്. ജയത്തോടെ പോയിന്റ് പട്ടികയില്‍ അത്‌ലറ്റികോ മാഡ്രിഡിനെ പിന്തള്ളി നാലാം സ്ഥാനത്ത് എത്താനും റയല്‍ മാഡ്രിന് കഴിഞ്ഞു. റയലിന് 15ഉം അത്‌ലറ്റികോക്ക് 14ഉം പോയിന്റാണുള്ളത്.

മറ്റ് മത്സരങ്ങളില്‍ എസ്പാനിയോള്‍ 2-0ന് റയല്‍ സോസിഡാഡിനെയും വിയ്യാറയല്‍ 3-1ന് സെല്‍റ്റ ഡി വീഗോയെയും പരാജയപ്പെടുത്തി.