തിരുവനന്തപുരം: വെസ്റ്റിന്ഡീസിനെതിരെയുള്ള ആദ്യ ഏകദിന മല്സരത്തില് പങ്കെടുക്കാന് ഇന്ത്യന് ക്രിക്കറ്റ് ടീം ഇന്ന് കൊച്ചിയിലെത്തും. വെസ്റ്റിന്ഡീസ് ടീം തിങ്കളാഴ്ചയും കൊച്ചിയിലെത്തും. തിങ്കളാഴ്ച ഉച്ചയ്ക്ക് ഒരുമണിയോടെ മുംബൈയില് നിന്നും ഇന്ഡിഗോ എയര്ലൈന്സിന്റെ പ്രത്യേക വിമാനത്തിലാണ് വെസ്റ്റന്ഡീസ് ടീം കൊച്ചിയിലെത്തുക.
തിങ്കളാഴ്ച ഹോട്ടലില് വിശ്രമിച്ചശേഷം ചൊവ്വാഴ്ച ഇരുടീമുകളും കലൂരിലെ അന്താരാഷ്ട്ര സ്റ്റേഡിയത്തില് പരിശീലനത്തിന് ഇറങ്ങും. രാവിലെ 9.30 മുതല് 12.30വരെയാണ് ടീം ഇന്ത്യ പരിശീലനത്തിന് സമയം ക്രമീകരിച്ചിരിക്കുന്നത്. ഉച്ചയ്ക്ക് 1.30 മുതല് വൈകുന്നേരം 4.30വരെ വെസ്റ്റിന്ഡീസ് ടീമും കലൂര് സ്റ്റേഡിയത്തില് നെറ്റ് പ്രാക്ട്രീസിന് ഇറങ്ങും. എട്ടാം തീയതിയാണ് പരമ്പരയിലെ ആദ്യ ഏകദിന മല്സരം കൊച്ചിയില് നടക്കുന്നത്. ബിസിസിഐയുടെ ഗ്രൗണ്ട് ആന്റ് പിച്ച് കമ്മിറ്റി അംഗം തപോഷ് ചാറ്റര്ജി ഇന്നലെ കൊച്ചിയിലെത്തി.
ഏകദിന ക്രിക്കറ്റ് മല്സരത്തിന്റെ ടിക്കറ്റ് കൗണ്ടര് നാളെ കലൂര് ജവഹര്ലാല് നെഹ്റു അന്താരാഷ്ട്ര സ്റ്റേഡിയത്തില് പ്രവര്ത്തനം തുടങ്ങും. രാവിലെ 10 മണി മുതല് വൈകുന്നേരം അഞ്ച് മണിവരെയാണ് ടിക്കറ്റ് കൗണ്ടറുകള് പ്രവര്ത്തിക്കുക. ചൊവ്വാഴ്ച്ച വരെ സ്റ്റേഡിയത്തിലെ കൗണ്ടറുകള് പ്രവര്ത്തിക്കും. മല്സരദിനമായ എട്ടിന് ഫെഡറല് ബാങ്ക് പാലാരിവട്ടം ശാഖയില് മാത്രമേ ടിക്കറ്റ് ലഭിക്കുകയുള്ളൂ.
ഇനി ഫെഡറല് ബാങ്കിന്റെ എറണാകുളം പാലാരിവട്ടം ശാഖയില് മാത്രമേ ടിക്കറ്റ് ലഭ്യമാകൂ. ഓണ്ലൈനിലൂടെയും ടിക്കറ്റ് ലഭിക്കും.
