827. ദഹനഃ – ദഹിപ്പിക്കുന്നവന്. ദഹനംകൊണ്ടു പുഷ്ടിപ്പെടുത്തുന്നവനാണു ഗുരുവായൂരപ്പന്. വീടുകളിലെ അടുക്കളയില് ഭക്ഷണം പാകംചെയ്യുന്ന അഗ്നി ഭഗവാന് തന്നെയാണു ജംരാഗ്നിയായി ഭക്ഷണത്തിന്റെ പുഷ്ടിപ്പെടുത്തുന്ന അംശം ശരീരധാതുക്കള്ക്ക് കൊടുക്കുന്നത്. മരിച്ചുകഴിഞ്ഞ് ശരീരത്തെ പഞ്ചഭൂതങ്ങളെ വേര്തിരിച്ച് കാട്ടിനു പുതിയ ശരീരം നല്കുന്നതും പ്രളയാഗ്നിയായി ലോകത്തെ നശിപ്പിച്ചു പുതിയ ലോകത്തിനു ജന്മം കൊടുക്കുന്നതും ദഹനനായ അഗ്നിതന്നെ. യാഗാഗ്നിയായി ഹവിസ്സ് സ്വീകരിച്ച് ദേവന്മാരെ തൃപ്തിപ്പെടുത്തുന്നതും സംവിദഗ്നിയായി കാമക്രോധലോഭാദികളെ നശിപ്പിക്കുന്നതും ദീപത്തിന്റെ രൂപത്തില് പ്രകാശം പരത്തുന്നതും ഇന്ധനങ്ങളെ എരിച്ച് ഊര്ജ്ജം നിര്മ്മിച്ച് ആധുനികകാലത്തെ വാഹനങ്ങളെ ചലിപ്പിക്കുന്നതും ആയുധങ്ങള്ക്കുള്ളില് സ്ഫോടകശക്തിയായി നാശവും ലാഭവും ഉണ്ടാക്കുന്നതും ദഹനനായ അഗ്നിയാണ്. അനലന് എന്ന 973-ാം നാമം നോക്കുക.
828. ശുചിഃ – ശുദ്ധിയുള്ളവന്, ശുദ്ധമാക്കുന്നവന്. അഗ്നിദേവന് ശുചിയാണ്. ഭഗവാനെ ഒരുതരത്തിലുള്ള മാലിന്യവും ബാധിക്കുകയില്ല. ഭഗവാന് സ്പര്ശിക്കുന്നതോടുകൂടി എല്ലാ അശുദ്ധിയും നശിക്കും.
ദുഃഖിപ്പിക്കുന്നവന് എന്നും ഈ നാമത്തെ വ്യാഖ്യാനിക്കാം. അടുപ്പില് കത്തുന്ന തീ വീട്ടില് പടര്ന്നുപിടിച്ചാല് ദുഃഖകാരണമാകും. ശരീരത്തിനുള്ളില് ജഠരാഗ്നിയായി പുഷ്ടിപ്പെടുത്തുന്ന അഗ്നി ജ്വരാഗ്നിയാല് രോഗമാക്കും.
(തുടരും)
