ജ്ഞാനയോഗമോ ഭക്തിയോഗമോ അല്ലെങ്കില് മറ്റേതെങ്കിലും മാര്ഗ്ഗവും സ്വീകരിക്കുമ്പോഴും സാധകനു ഒഴിച്ചുകൂടാത്ത ഒരു സാധനാ സിദ്ധിയാണ് മനോജയം അഥവാ മസ്സ്വാധീനത. ആത്മാവിനു സാധനയുടെ ആവശ്യമില്ല. സാധന ആത്മാവിനെ ബന്ധനത്തില്നിന്നും വിമുക്തമാക്കുവാന് വേണ്ടിയുമല്ല. കാരണം ആത്മാവ് ഒരിക്കലും ഒന്നിനോടും ബന്ധിതമല്ല. സ്വാതന്ത്ര്യവും സ്വയം പ്രകാശിതവും പരിപൂര്ണവുമാണ് ആത്മാവ്. താന് ബന്ധിതനാണെന്ന തെറ്റായ സങ്കല്പത്തില്നിന്നും നിങ്ങളുടെ മനസ്സിനെ വിമുക്തമാക്കുവാന് വേണ്ടിയാണ് സാധന വിധിച്ചിട്ടുള്ളത്. ബന്ധമോക്ഷങ്ങള് മനസ്സാണു ഭാവന ചെയ്യുന്നത്. വിഷയങ്ങളില് രമിച്ച്കൊണ്ടിരിക്കുന്ന മനസ്സ് ബന്ധത്തിനും വിഷയങ്ങളില്നിന്നും വിമുക്തമായ മനസ്സും മോക്ഷത്തിനു കാരണമാകുന്നു. വിഷയങ്ങളില് മാത്രം വ്യാപൃതമായി കഴിയുന്നിടത്തോളം കാലം ജീവന് മായക്ക് വശംവദനാണ്. വാസ്തവത്തില് മായക്ക് അസ്തിത്വമില്ല. ഇല്ലാത്ത ഒന്നിനെ ഉണ്ടെന്നുകരുതി അതില് ഭയവിഭ്രാന്തു ഉളവാക്കുന്നതാണു മായ.
സ്വതന്ത്രനും സ്വതസിദ്ധനുമായ ആത്മാവില് ബന്ധനം ആരോപിക്കുന്നതാണ് മായ. ഉള്ളതിനെ അതിന്റെ യഥാര്ത്ഥ രൂപത്തില് കാണാതെ മറ്റൊന്നായി വീക്ഷിക്കുന്നതാണ് അജ്ഞാനം. സച്ചിദാനന്ദസ്വരൂപമായ ബ്രഹ്മത്തെ നാമരൂപാത്മകമായി കാണിക്കുന്നത് അജ്ഞാനമാണ്. നശ്വരമായ ദേഹമാണ് താനെന്ന് കല്പിക്കുകയും അതില് അഭിമാനിക്കുകയും ചെയ്യുന്നത് കടുത്ത അജ്ഞാനം നിമിത്തമാണ്.
ആത്മാവില് ദേഹധര്മ്മങ്ങളായ ജനനമരണങ്ങളെ അധ്വാരോഹിക്കുന്നതു അജ്ഞാനം കൊണ്ടാണ്. അജ്ഞാനാവൃതമായ മനസ്സ് ബഹിര്ഗമിച്ച് ബാഹ്യവസ്തുക്കളില് ആസക്തമായി ചുറ്റിത്തിരിയുന്നിടത്തോളം കാലം ബ്രഹ്മത്തില് നിന്ന് വിഭിന്നമായി നാമരൂപാത്മകമായി ജഗത്ത് പ്രതിഭാസിച്ച് കൊണ്ടിരിക്കും. അഖണ്ഡവും പരിപൂര്ണവുമായ ബ്രഹ്മം ഒരിക്കലും ബ്രഹ്മഭിന്നമായ ജഗത്തായി മാറുകയില്ല. ഏകമായ പരബ്രഹ്മം ഒരിക്കലും പലതാവുകയുമില്ല.
തയ്യാറാക്കിയത്:
ടി. ഭാസ്കരന് കാവുംഭാഗം
