പെര്‍ഫക്ട് പ്രണോയ്

ജക്കാര്‍ത്ത: ഇന്ത്യന്‍ പുരുഷ ബാഡ്മിന്റണിലെ പുതു വിസ്മയവും മലയാളിയുമായ എച്ച്.എസ്. പ്രണോയിക്ക് കരിയറിലെ കന്നിക്കിരീടം. 25000 ഡോളര്‍ സമ്മാനത്തുകയുള്ള ഇന്തോനേഷ്യന്‍ മാസ്റ്റേഴ്‌സ് ഗ്രാന്‍ഡ് പ്രീ ഗോള്‍ഡ് ചാമ്പ്യന്‍ഷിപ്പില്‍ പ്രണോയ് ജേതാവായി. ഫൈനലില്‍ പ്രണോയ് ആതിഥേയ താരം ഫിര്‍മാന്‍ അബ്ദുള്‍ ഖോലിക്കിനെ തോല്‍പ്പിച്ചു (21-11, 22-20). അടുത്തിടെ വിയറ്റ്‌നാം ഗ്രാന്‍ഡ് പ്രീയില്‍ റണ്ണറപ്പായ പ്രണോയ്‌യുടെ അപാര ഫോം അടിവരയിടുന്നതായി മത്സരഫലം.

ആദ്യ ഗെയിമില്‍ പ്രണോയ് ആധികാരികമായി തന്നെ കളിച്ചു. 6-2ന് മുന്നില്‍ക്കയറിയ ഇന്ത്യന്‍ സ്റ്റാര്‍ ക്രമാനുഗതമായി ലീഡ് ഉയര്‍ത്തി ഗെയിം പോക്കറ്റിലാക്കി. എന്നാല്‍ രണ്ടാം ഗെയിമില്‍ ഖോലിക്ക് ഇഞ്ചോടിഞ്ച് പൊരുതി. 5-3ന് ലീഡു പിടിക്കാനും ഇന്തോനേഷ്യക്കാരന് കഴിഞ്ഞു. തിരിച്ചടിച്ച പ്രണോയ് 6-6 എന്ന നിലയിലെത്തിച്ചു. പിന്ന 9-7ന് മുന്നില്‍ക്കയറി. പൊരുതിയ ഖോലിക്ക് വീണ്ടും ആധിപത്യം നേടിയെടുത്തു (12-9). പിന്നീട് കുതിച്ച പ്രണോയ് നാല് മാച്ച് പോയിന്റുകള്‍ സ്വന്തമാക്കി.

പക്ഷേ, വിട്ടുകൊടുക്കാന്‍ തയ്യാറാകാത്ത ഖോലിക്ക് വീണ്ടു തുല്യംനിന്നു (20-20). എങ്കിലും തുടരെ രണ്ടു പോയിന്റുകളോടെ പ്രണോയ് കിരീടം കൈക്കുള്ളിലൊതുക്കി. ട്രോഫി നേടാനാവുമെന്ന് കരുതിയില്ല. വിയ്റ്റ്‌നാമിലെ തോല്‍വി നിരാശപ്പെടുത്തി. വിജയത്തെക്കുറിച്ച് ചിന്തിക്കാതെ അടിസ്ഥാനപരമായ കാര്യങ്ങളില്‍ ശ്രദ്ധിച്ചാല്‍ ഫലം ലഭിക്കുമെന്ന് അറിയാമായിരുന്നു, പ്രണോയ് പറഞ്ഞു.