എരുമേലി: സ്കൂള്വിദ്യാര്ത്ഥികള്ക്ക് പന്നിയിറച്ചി വിളമ്പിയ അധ്യാപകന് ക്രൂരമായി മര്ദ്ദനമേറ്റു. എരുമേലി സെന്റ്തോമസ് ഹൈസ്കൂളിലെ എന്സിസി വിദ്യാര്ത്ഥികള്ക്ക് പന്നിയിറച്ചി വിളമ്പിയ രാജീവ് ജോസഫിനാണ് ക്രൂരമായ മര്ദ്ദനമേറ്റത്. സംഭവത്തില് തെറ്റ് പറ്റിയെന്ന് സ്കൂള് അധികൃതര് വിശദീകരണം നല്കിയെങ്കിലും ഇത് വകവയ്ക്കാതെ പ്രതിഷേധക്കാര് അധ്യാപകനെ ക്രൂരമായി മര്ദ്ദിക്കുകയായിരുന്നു. വ്യാഴാഴ്ച മൂന്ന് മണിയോടെയാണ് സംഭവം. സെന്റ് തോമസ് ഹൈസ്കൂളിന്റെ പഴയ കെട്ടിടം പൊളിച്ചുമാറ്റുന്നതിനായി സ്കൂളിന്റെ ഓഫീസ് പുതുതായി നിര്മ്മിച്ച കെട്ടിടത്തിലേക്ക് മാറ്റുന്നതിന്റെ ഭാഗമായി അധ്യാപകര്ക്ക് സല്ക്കാരം ഏര്പ്പെടുത്തിയിരുന്നു. സല്ക്കാരത്തില് മിച്ചം വന്ന ഭക്ഷണം എന്സിസി വിദ്യാര്ത്ഥികള്ക്ക് കൊടുക്കാന് അധ്യാപകനായ രാജീവ് ജോസഫിനെ ചുമതലപ്പെടുത്തുകയായിരുന്നു. പന്നിയിറച്ചിയും കപ്പയും, പത്തിരിയും മീന്കറിയുംഉള്പ്പെടെയുള്ള ആഹാരസാധനങ്ങള് കൊണ്ടുവന്ന അധ്യാപകന് റംസാന് നോമ്പു നോക്കുന്ന വിദ്യാര്ത്ഥികള് ആഹാരം കഴിക്കരുതെന്നും പന്നിയിറച്ചിയാണെന്നും നിര്ദ്ദേശിച്ചിരുന്നു. തുടര്ന്ന് മിക്ക കുട്ടികളും ആഹാരം കഴിക്കാതെ പോവുകയും ചെയ്തു.
എന്നാല് ഇന്നലെ മുസ്ലീംമതവിഭാഗത്തില് പെട്ട കുട്ടികള്ക്ക് പന്നിയിറച്ചി നല്കിയെന്ന കിംവദന്തി സ്കൂളില് പരന്നതോടെ ജമാ അത്തും പ്രതിഷേധവുമായി രംഗത്ത് വരികയായിരുന്നു. സംഭവം രാവിലെ മുതല് ജമാ അത്തും സ്കൂള് അധികൃതരും തമ്മില് ചര്ച്ച ചെയ്യുന്നുണ്ടെങ്കിലും സ്കൂള് അധികൃതരുടെ ഭാഗത്തുനിന്നുണ്ടായ വീഴ്ചയാണ് സംഭവം സംഘര്ഷത്തിലെത്തിച്ചതെന്നും പറയുന്നു. ഉച്ചയ്ക്ക് ശേഷം സ്കൂളില് എത്തിയ ജമാ അത്ത് ഭാരവാഹികളുടെ നേരെ അധ്യാപകന് ഈ പ്രശ്നത്തില് ധിക്കാരപരമായിസംസാരിക്കുകയായിരുന്നുവെന്നും ജമാ അത്ത് ഭാരവാഹികള് പറഞ്ഞു. ഇതില് പ്രകോപിതരായ പ്രതിഷേധക്കാര് അധ്യാപകനെ മര്ദ്ദിക്കുകയായിരുന്നു. സ്കൂളിന്റെ ജനാലകളും കസേരകളും കതകുകളും പ്രതിഷേധക്കാര് അടിച്ചു തകര്ത്തു. നാമമാത്രമായ ഉദ്യോഗസ്ഥര് അടങ്ങുന്ന പോലീസ് സംഘമാണ് സംഭവസ്ഥലത്ത് എത്തിയതെന്നും പറയുന്നു. ഇവര് വൈകിയതായും ആക്ഷേപമുണ്ട്. ഇതും സംഘര്ഷം മൂര്ച്ഛിക്കാന് ഇടയാക്കി. സ്കൂള്വിദ്യാര്ത്ഥികളെ കയറ്റിയ വാഹനങ്ങളും പ്രതിഷേധക്കാര് മണിക്കൂറുകളോളം തടഞ്ഞുവച്ചു. കാഞ്ഞിരപ്പള്ളി ഡിവൈഎസ്പി സ്ഥലത്തെത്തി അധ്യാപകനെ കസ്റ്റഡിയില് എടുത്തതോടെയാണ് സംഘര്ഷത്തിന് അയവു വന്നത്.
