കാക്കനാട്: പച്ചമരുന്ന് കൊണ്ട് തീപ്പൊള്ളലും പൊള്ളലിന്റെ വേദനയും നിമിഷങ്ങള്ക്കകം മാറ്റുന്ന കൈപുണ്യവുമായി തൃക്കാക്കര കുഴിക്കാട്ടുമൂലയില് ശോശാമ്മ പത്രോസ് എന്ന 80 വയസ്സുകാരി വൈദ്യത്തിയമ്മ നാട്ടുകാരുടെ പുണ്യമായി മാറിയിട്ട രണ്ടു ദശകം പിന്നിട്ടിരിക്കുന്നു. ഇതിനോടകം തീപ്പൊള്ളലിനും മഞ്ഞപ്പിത്തത്തിനും കണ്ണിലെ മുറിവുകള്ക്കും ചികിത്സക്കായി സമീപിച്ചവര് ആയിരത്തിലേറെയാണ്.
തൃക്കാക്കര ബ്ലോക്ക് പഞ്ചായത്ത് ആഫീസിന് സമീപമുള്ള ‘ചക്കാലമൂലയില്’ എന്ന വീട്ടില് നേരം പുലരും മുന്പേ ദൂരെ സ്ഥലങ്ങളില്നിന്നും രോഗികളെത്തും. ചില ദൂതലക്ഷണങ്ങളാല് ഓരോരുത്തരും എന്തിനു വന്നുവെന്ന ചെറിയൊരു ഊഹം തനിക്കുണ്ടാകുമെന്ന് ശോശാമ്മ പറഞ്ഞു. മുരിവില് പുരട്ടുന്നതിനായി തൈലമാണ് ശോശാമ്മ ആദ്യം രോഗികള്ക്ക് നല്കുന്നത്.
പാമ്പാക്കുടയിലെ പേരുകേട്ട മാമലശ്ശേരി വൈദ്യന് മുത്തപ്പന്റെ പരമ്പരയില്പ്പെട്ട പിതാവ് ഇട്ടനില് നിന്നും പകര്ന്നു കിട്ടിയ അറിവുകളും, കണ്ടറിഞ്ഞ ചികിത്സയുമാണ് ശോശാമ്മയുടെ കൈമുതല്. മുത്തച്ഛന് ചെറിയയും വൈദ്യനായിരുന്നു.
പാമ്പാക്കുടയില് നിന്നും ഇവര് കാക്കനാട് നിലംപതിഞ്ഞിയില് താമസമായെങ്കിലും അവിടെ നിന്ന് കുഴിക്കാട്ടുമൂലയില് മാറുകയായിരുന്നു. കൂടെ താമസിക്കുന്ന ഇളയ സഹോദരി സിസിലിയും മകന് പ്രസാദും പാരമ്പര്യം കാത്തുസൂക്ഷിക്കുന്നുണ്ട്. ഒരിക്കല് പോലും ചികിത്സയ്ക്കുള്ള തുക ഇവര് ചോദിച്ചു വാങ്ങിച്ചിട്ടില്ല. എന്നാല് രോഗം മാറി ദക്ഷിണയുമായി എത്തുന്നവരുടെഎണ്ണം കുറവല്ല. ശോശാമ്മ പത്രോസിനെ ബന്ധപ്പെടാനുള്ള ഫോണ് നമ്പര് : 0484 6519087.
സൗഭാഗ്യം പദ്മകുമാര്
