കൊച്ചി: കര്‍ക്കിടകം വരവായി, ഇനി രാമകഥകളുടെ നാളുകള്‍. വീടുകളും ക്ഷേത്രങ്ങളും രാമായണ ശീലുകള്‍കൊണ്ട് മുഖരിതമാകും. രാമായണ പുണ്യം നുകരാന്‍ ജില്ലയിലെ ക്ഷേത്രങ്ങളെല്ലാം രാമായണ മാസാചരണത്തിനായി ഒരുങ്ങിക്കഴിഞ്ഞു. വിഎച്ച്പി, ഹിന്ദുഐക്യവേദി, വിവിധ സാമുദായിക സംഘടനകള്‍ എന്നിവയുടെ നേതൃത്വത്തിലും രാമായണമാസം വിപുലമായി ആഘോഷിക്കും. വിഎച്ച്പിയുടെ നേതൃത്വത്തില്‍ ജില്ലയില്‍ നടക്കുന്ന രാമായണ മാസാചരണത്തിന്റെ ഉദ്ഘാടനം കലൂര്‍ പാവക്കുളം ക്ഷേത്ര ഓഡിറ്റോറിയത്തില്‍ പ്രൊഫ. എം.കെ.സാനു നിര്‍വഹിക്കും. എറണാകുളം കരയോഗവും ക്ഷേത്രസംരക്ഷണ സമിതിയും സംയുക്തമായി ടിഡിഎം ഹാളില്‍ സംഘടിപ്പിക്കുന്ന രാമായണ മഹോത്സവത്തിന്റെ ഉദ്ഘാടനം ഇന്ന് വൈകിട്ട് നടക്കും. ഹിന്ദു ഐക്യവേദി സംസ്ഥാന പ്രസിഡന്റ് കെ.പി.ശശികല ടീച്ചര്‍ മുഖ്യ പ്രഭാഷണം നടത്തും. കളക്ടര്‍ എം.ജി.രാജമാണിക്യം ഉദ്ഘാടനം നിര്‍വഹിക്കും.
ചോറ്റാനിക്കര ദേവി ക്ഷേത്രത്തിലെ ഒരു മാസം നീണ്ടുനില്‍ക്കുന്ന കര്‍ക്കിടക മാസാചരണത്തിന്റെ ഉദ്ഘാടനം ഇന്ന് വൈകിട്ട് 6 ന് കൊച്ചി ദേവസ്വം ബോര്‍ഡ് പ്രസിഡന്റ് എം.പി.ഭാസ്‌കരന്‍ നായര്‍ നിര്‍വഹിക്കും. 17 മുതല്‍ 23 വരെ ഭാഗവത സപ്താഹയജ്ഞവും നടക്കും. 24 ന് ഗോപീവാര്യര്‍ സമ്പൂര്‍ണ രാമായണപാരായണം നടത്തും. കൂടാതെ 26 ന് ആലപ്പാട്ട് അമ്മിണി അമ്മയുടെ മുഖ്യ കാര്‍മികത്വത്തില്‍ ദേവീഭാഗവത നവാഹയജ്ഞം നടക്കും.
കലൂര്‍ പാവക്കുളം ക്ഷേത്രത്തില്‍ രാമായണ മാസാചരണത്തിന്റെ ഭാഗമായി 17 ന് രാവിലെ 5 ന് മഹാഗണപതി ഹോമം, രാവിലെ 6 മുതല്‍ സമ്പൂര്‍ണ രാമായണ പാരായണം എന്നിവ ഉണ്ടാകും. കൂടാതെ കര്‍ക്കിടക മാസത്തിലെ എല്ലാ വെള്ളിയാഴ്ചകളിലും ഉച്ചയ്‌ക്ക് 12.30 ന് ഔഷധ കഞ്ഞി വിതരണം ഉണ്ടാകും. ഔഷധ സേവാദിനമായ ആഗസ്റ്റ് ഒന്ന് വെള്ളിയാഴ്ച രാവിലെ 7 മുതല്‍ ഔഷധാര്‍ച്ചനയും നടക്കും. രാമായണ മാസാചരണത്തിന്റെ ഭാഗമായി നടക്കുന്ന നാലമ്പലദര്‍ശനത്തിന് എറണാകുളം ജില്ലയിലെയും സമീപ ജില്ലകളിലെയും നാലമ്പലങ്ങളില്‍ വിപുലമായ ഒരുക്കങ്ങളാണ് നടത്തിയിട്ടുള്ളത്.
തൃപ്പൂണിത്തുറ ശ്രീപൂര്‍ണ്ണത്രയീശ വൃദ്ധസദനത്തിന്റെ ആഭിമുഖ്യത്തില്‍ രാമായണ മാസാചരണം ഉദ്ഘാടനം 17ന് വ്യാഴാഴ്ച രാവിലെ 10.30ന് വിഎച്ച്പി സംസ്ഥാന പ്രസിഡന്റ് ജസ്റ്റിസ് എം.രാമചന്ദ്രന്‍ നിര്‍വഹിക്കും. കേരള ഫ്രെയിം മാഗസിന്‍ ചീഫ് എഡിറ്റര്‍ അംബികാ നായര്‍ അദ്ധ്യക്ഷത വഹിക്കും. നാടക നടന്‍ കൊച്ചിന്‍ രാമചന്ദ്രന്‍, വിശ്വഹിന്ദു പരിഷത്ത് പ്രഖണ്ഡ് സെക്രട്ടറി സി.എസ്.ബാലചന്ദ്രന്‍ എന്നിവര്‍ സംസാരിക്കും. വേണു കെ.പി.പിള്ള രാമായണ സന്ദേശം നല്‍കും.
എറണാകുളം ശ്രീകുമാരേശ്വര സുബ്രഹ്മണ്യ ക്ഷേത്രത്തിലെ രാമായണ മാസാചരണം 17ന് വ്യാഴാഴ്ച ആരംഭിച്ച് അഗസ്റ്റ് 16ന് അവസാനിക്കുന്നു. രാമായണ മാസചരണത്തോടനുബന്ധിച്ച് നിത്യവും വിശേഷാല്‍പൂജ, രാമായണ പാരായണം, ഗണപതി ഹവനം, ഭഗവത്‌സേവ എന്നിവ ഉണ്ടായിരിക്കുന്നതാണ്. കടവന്ത്ര ദേവീക്ഷേത്രത്തിലെ രാമായണ മാസാചരണം 17 മുതല്‍ ആഗസ്റ്റ് 16 വരെ ആചരിക്കുന്നു. എല്ലാ ദിവസവും രാമായണ പാരായണം, രാമായണ പ്രശ്‌നോത്തരി, പ്രഭാഷണങ്ങള്‍, രാമായണ ക്വിസ്സ് എന്നിവ നടത്തപ്പെടുന്നു. ജൂലൈ 27ന് ബ്രഹ്മശ്രീ സുബ്രഹ്മണ്യന്‍ നമ്പൂതിരിപ്പാടിന്റെ കാര്‍മ്മികത്വത്തില്‍ നടക്കും.
