കൊച്ചി: നഗരത്തിലെ രാത്രി യാത്രികരെ കബളിപ്പിക്കാന്‍ ഓട്ടൊറിക്ഷാ ഡ്രൈവര്‍മാരുടെ പുതിയ തന്ത്രം. ബാക്കി നല്‍കുന്ന ചില്ലറ തുട്ടുകള്‍ക്കൊപ്പം നാണയത്തിന്റെ രൂപത്തിലുള്ള ചൈന മോഡല്‍ സെല്‍ ബാറ്ററികളും കൈമാറുന്നതാണ് ഡ്രൈവര്‍മാരുടെ ടെക്‌നിക്ക്. പുതിയ മോഡല്‍ അഞ്ചു രൂപ നാണയ തുട്ടിന്റെ അതേ വലിപ്പമാണ് ഇത്തരം സെല്ലുകള്‍ക്ക്. രൂപവും കനവും അതു തന്നെ. പഴയ മോഡല്‍ നാണയങ്ങള്‍ക്കുള്ള പരുക്കന്‍ പ്രതലം ഇപ്പോഴത്തെ നാണയങ്ങള്‍ക്കില്ല. ചൈന മോഡല്‍ സെല്‍ ബാറ്ററികള്‍ക്കും ഇതേ പോലെ മിനുസമായ പ്രതലമാണ്.
അടുത്തിടെയായി നഗരത്തില്‍ നിരവധി പേര്‍ക്കാണ് ഇത്തരത്തില്‍ അനുഭവം ഉണ്ടാകുന്നത്. രാത്രിയില്‍ സര്‍വീസ് നടത്തുന്ന ഓട്ടൊറിക്ഷ ഡ്രൈവര്‍മാരാണ് തട്ടിപ്പിനു പിന്നില്‍. തിരക്കിട്ട് പോകാനൊരുങ്ങുന്ന യാത്രക്കാരും മദ്യപന്‍മാരുമാണ് കബളിപ്പിക്കപെടുന്നത്. യാത്ര അവസാനിപ്പിക്കുമ്പോള്‍ വാഹനം വെളിച്ചം കുറഞ്ഞ ഭാഗത്ത് പാര്‍ക്കു ചെയ്യും. തുടര്‍ന്ന് മൊബൈല്‍ വെളിച്ചത്തിലായിരിക്കും കാശു വാങ്ങുന്നതും ബാക്കി നല്‍കുന്നതും. പോകാന്‍ തിടുക്കം കൂട്ടുന്ന യാത്രക്കാരന് ചില്ലറ തുട്ടുകള്‍ക്കൊപ്പം സെല്‍ ബാറ്ററി നല്‍കി തടിതപ്പുകയാണ് രീതി. കഴിഞ്ഞ ദിവസം കലൂരില്‍ നിന്നും ഓട്ടൊറിക്ഷ വിളിച്ച യാത്രക്കാരന് ബാക്കി നല്‍കേണ്ട പത്തു രൂപയ്‌ക്ക് പകരം ലഭിച്ചത് രണ്ടു സെല്ലുകള്‍. വീട്ടിലെത്തിയപ്പോളാണ് കബളിപ്പിക്കപ്പെട്ടുവെന്ന് മനസിലാക്കിയത്.
മദ്യ ശാലകള്‍ കേന്ദ്രീകരിച്ചാണ് ഇവരുടെ പ്രവര്‍ത്തനം. ലഹരിയിലായ യാത്രികര്‍ ചില്ലറ തുട്ടുകള്‍ എണ്ണി നോക്കാന്‍ മിനക്കെടാറില്ല.
ചൈന മോഡല്‍ ടോര്‍ച്ചുകളിലാണ് ഇത്തരം സെല്‍ ബാറ്ററികള്‍ കൂടുതലായി ഉപയോഗിക്കുന്നത്. ചൈനീസ് ഗിഫ്റ്റ് ഐറ്റങ്ങളിലും ഇത്തരം സെല്ലുകള്‍ ഉപയോഗിക്കാറുണ്ട്. ചൈനീസ് ഉല്‍പ്പന്നങ്ങള്‍ വില്‍പ്പന നടത്തുന്ന സ്ഥാപനങ്ങളില്‍ നിന്നുമാണ് ഓട്ടൊ റിക്ഷാ ഡ്രൈവര്‍മാര്‍ ഇത്തരം സെല്ലുകള്‍ സംഘടിപ്പിക്കുന്നത്. വേഗത്തില്‍ തകരാര്‍ സംഭവിക്കുന്ന ചൈനീസ് ഉല്‍പ്പന്നങ്ങള്‍ നന്നാക്കാനായി കൊണ്ടു വരുമെങ്കിലും പലരും പിന്നീട് ഇത് ഉപേക്ഷിക്കുകയാണ് പതിവ്. ഇത്തരത്തില്‍ ഉപേക്ഷിക്കപ്പെടുന്ന സെല്ലുകളാണ് ഡ്രൈവര്‍മാര്‍ ശേഖരിക്കുന്നത്. ഓട്ടൊറിക്ഷകള്‍ക്കു പുറമേ നഗരത്തിലെ പെട്ടിക്കടകളിലും ഇത്തരത്തില്‍ നാണയങ്ങള്‍ക്കു പുറമേ സെല്ലുകള്‍ നല്‍കി കടന്നു കളയുന്നവരുണ്ട്. നഷ്ടപ്പെടുന്നത് ചെറിയ തുകകള്‍ ആയതിനാല്‍ പരാതിപെടാനും ആരും മിനക്കെടാറില്ല. ഇതാണ് ഇത്തരക്കാര്‍ക്ക് വളമാകുന്നത്.
