ന്യൂദല്ഹി: പുതുതലമുറയ്ക്ക് സാംസ്ക്കാരിക വിദ്യാഭ്യാസം പകര്ന്നു നല്കുകയെന്നത് കാലഘട്ടത്തിന്റെ അനിവാര്യതയാണെന്ന് പണിക്കേഴ്സ് ട്രാവല്സ് എം.ഡി ബാബു പണിക്കര് പറഞ്ഞു. നാടിന്റെ സംസ്ക്കാരം അറിയാതെയും അതില് അഭിമാനം കൊള്ളാതെയും വളരുന്ന തലമുറ നാടിന്റെ രക്ഷയ്ക്ക് ഉപകാരപ്രദമാകില്ലെന്നും അദ്ദേഹം പറഞ്ഞു. നെഹ്രു സരസ്വതി വിദ്യാമന്ദിര് സീനിയര് സെക്കന്ററി സ്കൂളില് നടന്ന ബാലഗോകുലം സംസ്ഥാന സമ്മേളനം ഉദ്ഘാടനം ചെയ്തു സംസാരിക്കുകയായിരുന്നു ബാബു പണിക്കര്.
രാഷ്ട്രപുനര് നിര്മ്മാണത്തില് സ്വാധീനം ചെലുത്താന് കഴിയുന്ന പുതുതലമുറയില് വിനയവും ഭക്തിയും വളര്ത്തിയെടുക്കേണ്ടത് ബാലഗോകുലം പ്രവര്ത്തകരുടെ ചുമതലയാണെന്ന് ബാലഗോകുലം കേരളാ സംഘടനാ കാര്യദര്ശി സി.കെ സുനില്കുമാര് പറഞ്ഞു. സംസ്ഥാന സമിതി അദ്ധ്യക്ഷന് കെ.വി രാമചന്ദ്രന് അദ്ധ്യക്ഷത വഹിച്ച ചടങ്ങില് മാര്ഗ്ഗദര്ശി എന്. വേണുഗോപാല്,രക്ഷാധികാരി എംപി ബാലകൃഷ്ണന്, അന്താരാഷ്ട്ര ശ്രീകൃഷ്ണകേന്ദ്രം ട്രഷറര് പി.കെ വിജയരാഘവന്, ജനറല് സെക്രട്ടറി എം.ആര് വിജയന്, കണ്വീനര് വി.ആര് രാമന് എന്നിവര് പ്രസംഗിച്ചു. പത്ത്,പന്ത്രണ്ട് ക്ലാസുകളില് മികച്ച വിജയം നേടിയ ബാലഗോകുലം പ്രവര്ത്തകരെ സമ്മേളനത്തില് അനുമോദിച്ചു. ബാലഗോകുലം ദല്ഹി സംസ്ഥാന സമിതി ഭാരവാഹികളായി കെ.വി രാമചന്ദ്രന്(പ്രസിഡന്റ്), പി.കെ സുരേഷ്(ജനറല് സെക്രട്ടറി), എന്. വേണുഗോപാല്(മാര്ഗ്ഗദര്ശി),എം.പി ബാലകൃഷ്ണന്(രക്ഷാധികാരി), എം.ആര് വിജയന്(ഓര്ഗനൈസിംഗ് സെക്രട്ടറി),ശ്രീനിവാസന് നായര്(ഖജാന്ജി) എന്നിവരെ തെരഞ്ഞെടുത്തു.
