472. ലോകബന്ധു ഃ – സൃഷ്ടിയുടെ ചുമതല ബ്രഹ്മദേവനും രക്ഷിക്കാനുള്ള ചുമതല വിഷ്ണുഭഗവാനും സംഹരിക്കാനുള്ള ചുമതല ശിവനുമായി. സൃഷ്ടിയും സ്ഥിതിയും സംഹാരവും ഓരോ പ്രവര്ത്തനത്തിന്റെ ഭിന്നഭാവങ്ങളാണ്. മൂന്നും തുടര്ച്ചയായി നടക്കുന്നതാണ് പ്രപഞ്ച പ്രവര്ത്തനം. പ്രപഞ്ചപ്രവര്ത്തനം സുഗമമാകുന്നതിന് ഗുരുവായൂരപ്പന് പ്രപഞ്ചത്തില് ഒരിടത്തും ധര്മ്മച്യുതി ഉണ്ടാക്കാതെ സദാ ശ്രദ്ധിക്കുന്നു. അതുവഴി നന്മയിലേക്കും വളര്ച്ചയിലേക്കും ലോകത്തെ നയിക്കുന്നു. അതിനാല് ഭഗവാനെ ലോകബന്ധുവായി സ്തുതിക്കുന്നു.
473. ബാലകൃഷ്ണ ഃ – ബാലനായ കൃഷ്ണന്. ശ്രീകൃഷ്ണനായി ഭഗവാന് അവതരിച്ച കഥ പ്രസിദ്ധം. ആ അവതാരത്തില് കംസവദംവരെയുള്ള കൃഷ്ണനെയാണ് ബാലകൃഷ്ണന് എന്നുപറയാറുള്ളത്. വിഷ്ണുവിന്റെ പല അവതാരങ്ങളില് ലോകത്തെ ഏറ്റവും കൂടുതല് ആകര്ഷിക്കുകയും ആനന്ദിപ്പിക്കുകയും ആരാധിപ്പിക്കുകയും ചെയ്ത രൂപം ബാലകൃഷ്ണന്റേതാണ്. ശ്രീമദ്ഭാഗവതം ദശമസ്കന്ധത്തിലെ ആദ്യത്തെ നാല്പത്തഞ്ചദ്ധ്യായങ്ങളിലെ മുഖ്യകഥാപാത്രം ബാലകൃഷ്ണനാണ്. ഭാഗവത സംഗ്രഹമായ നാരായണീയത്തിലെ 38 മുതല് 75 വരെയുള്ള ദശകങ്ങള് ബാലകൃഷ്ണന്റെ അപദാനങ്ങള് വര്ണിക്കുന്നു. നൂറാം ദശകത്തില് കവി മുന്നില് കണ്ടു വര്ണ്ണിച്ചതും ബാലകൃഷ്ണന്റെ ദിവ്യകൈശോര വേഷത്തെയാണ് നൂറാം ദശകത്തിലെ ശ്ലോകങ്ങള് ഓരോന്നായി സങ്കല്പിച്ചുറപ്പിച്ചാല് ഭട്ടതിരിപ്പാടിനു ലഭിച്ച പരമാനന്ദ സന്ദോഹലക്ഷ്മിയെ സാക്ഷാത്കരിക്കാന് കഴിയും.
474. സതാംഗതി ഃ – സത്തുകള്ക്കു ഗതിയായവന് ധര്മാചരണത്തില് നിഷ്ഠയും സഹജീവികളില് സ്നേഹവും ക്ലേശമനുഭവിക്കുന്നവരില് കാരുണ്യവും ജ്ഞാനം നേടുന്നതില് താത്പര്യവും ഭഗവാനില് ഭക്തിയും പെരുമാറ്റത്തില് വിനയവും ഉള്ളവരാണ് സത്തുക്കള്. ഗതി എന്ന പദത്തിന് ആശ്രയം, ശരണം, രക്ഷ, മോക്ഷം, ശ്രേയസ്സ്, അഭിവൃദ്ധി, പ്രാപ്യസ്ഥാനം എന്നിങ്ങനെ ബന്ധപ്പെട്ട വിവിധാര്ത്ഥങ്ങള്. രണ്ടും ചേര്ന്ന സതാംഗതി എന്ന പദത്തിന് . ശങ്കരഭഗവത് പാദര് കൊടുക്കുന്ന നിര്വചനം ”സതാം മുമുക്ഷൂണാം നാന്യാ ഗതിരീതി സതാംഗതി” എന്നാണ്. ഗുരുവായൂരപ്പന്റെ നാമമായി സ്വീകരിക്കുമ്പോള് ഈ നിര്വചനം നമുക്കും സ്വീകരിക്കാം. മോക്ഷം ആഗ്രഹിക്കുന്ന സത്തുക്കള്ക്ക് മഹാവിഷ്ണുവല്ലാതെ വേറെ അഭയമില്ല. ”അനന്യാശ്ചിന്തയന്തോ മാം യേജനാഃ പര്യപാസതേ.
ഡോ. ബി.സി.ബാലകൃഷ്ണന്
(തുടരും)
