വിജ്ഞാനമുണ്ടായ്വന്നാലജ്ഞാനമകന്നീടും
അജ്ഞാനം നശിക്കുമ്പോള് ജ്ഞാനവും പ്രകാശിക്കും
ജ്ഞാനമെന്നതുപരമാന്ദസ്വരൂപനെ
മാനസത്തിനാലറിയപ്പെടുന്നതുതന്നെ
താന് തന്റെ മനസ്സിങ്കലാത്മാവെയറിയുമ്പോള്
സ്വാന്തവുമേകാഗ്രമായാനന്ദസ്വരൂപനാം
ഈശ്വരനഹമെന്നു നിശ്ചയം വരുമെന്നു
നിശ്ചയിച്ചാലും വേദവാക്യങ്ങളിവയെല്ലാം
സത്യമെന്നുറച്ചകക്കാമ്പിങ്കല് ഭക്തിയോടും
തത്ത്വജ്ഞാനാര്ത്ഥിയായിജ്ജീവിക്ക ശുഭപ്രിയേ!
ആശയം: ശുഭപ്രിയേ! വിജ്ഞാനം ഉണ്ടാകുമ്പോള് അജ്ഞാനം അകന്നുപോകും. അജ്ഞാനം നശിക്കുമ്പോള് ജ്ഞാനവും പ്രകാശിക്കും. വിജ്ഞാനം എന്നാല് വിശേഷജ്ഞാനം. താന് ആത്മാവാണെന്ന അറിവ്. വിളക്കു കത്തിക്കുമ്പോള് ഇരുട്ട് അകന്നുപോകുന്നതുപോലെ വിജ്ഞാനം ലഭിക്കുമ്പോള് അജ്ഞാനമാകുന്ന അന്ധകാരം നീങ്ങുന്നു. അതുപോലെ അജ്ഞാനം നശിക്കുമ്പോള് ആത്മജ്ഞാനം പ്രകാശിക്കും. ആത്മജ്ഞാനം എന്നതു മറ്റൊന്നുമല്ല. പരമാനന്ദസ്വരൂപനെ മനസ്സുകൊണ്ടറിയുന്നതുതന്നെ. ഞാന് തന്നെ തന്റെയുള്ളില് ആത്മാവായിരിക്കുന്നു എന്നും സ്വന്തം ഉള്ളില് ഏകാഗ്രമായി ആനന്ദസ്വരൂപനായി ഇരിക്കുന്ന ഈശ്വരന് ഞാന് തന്നെ എന്നും നിശ്ചയം വരുമെന്നുറയ്ക്കുക. വേദവാക്യങ്ങളില് പറയുന്നതെല്ലാം സത്യമാണെന്ന് ബോധ്യപ്പെട്ട് ഉള്ളില് നിറഞ്ഞ ഭക്തിയോടെ, തത്ത്വജ്ഞാനം നേടണമെന്നുള്ള ആഗ്രഹത്തോടെ ജീവിക്കുക.
തുഞ്ചത്ത് രാമാനുജന് എഴുത്തച്ഛന്
വ്യാഖ്യാനം : സ്വാമി സുകുമാരാനന്ദ (ആനന്ദാശ്രമം)
പ്രതികരിക്കാൻ ഇവിടെ എഴുതുക: