സത്ഭാവംകൊണ്ടും സല്ക്കര്മ്മങ്ങള്കൊണ്ടും മനസ്സിന്റെ മാലിന്യങ്ങളെ അകറ്റാന് കഴിയും. ഭാവത്തിന്റെ ആസ്ഥാനം മനസ്സാണ്. ഇന്ദ്രിയങ്ങളെ ഉപാധിയാക്കിയാണ് കര്മ്മങ്ങള് നടത്തുന്നത്.
ഭാവശുദ്ധിയും കര്മശുദ്ധിയുമാണ് ഒരാളെ ഈ ശ്വരങ്കലെത്തിക്കുന്നത്. ഈ രണ്ട് ഘടകങ്ങളും അവഗണിക്കപ്പെട്ടാല് ഒരാള് സാധനയുടെപേരില് എന്തൊക്കെ ചെയ്തിരുന്നാലും ഒരു യഥാര്ത്ഥ സാധകനാകാന് കഴിയുകയില്ല.
സത്സ്വഭാവങ്ങളാല് സ്വയം സമ്പന്നരാകണം സല്സ്വഭാവശീലനായ ഒരാള്ക്ക് മാത്രമേ യഥാര്ത്ഥ സാധകനാകാന് കഴിയൂ. നിങ്ങളുടെ സ്വഭാവവും മറ്റുള്ളവരുമായുള്ള പെരുമാറ്റവും കുറ്റമറ്റതായിരിക്കണം. യോഗമാര്ഗ്ഗത്തിലേക്കുയര്ന്ന് ഈശ്വരനെ സാക്ഷാത്കരിക്കുന്നതിന് ആദ്യമായി മാതൃകാപരമായ മനുഷ്യത്വത്തില് യോഗ്യമായ സല്സ്വഭാവങ്ങള് സമ്പാദിക്കേണ്ടതുണ്ട്.
നിങ്ങളുടെ പ്രതിദിന ജീവിതചര്യ ഇഷ്ടദേവതയെ കേന്ദ്രമാക്കി പരിവര്ത്തനം ചെയ്യുന്നതായിരിക്കണം. എന്നു പറഞ്ഞാല് ഇഷ്ടദേവതയെ സദാപി സ്മരിക്കുകയും സശ്രദ്ധമായ ദൃഷ്ടിക്ക് വിധേയനാണെന്ന ജ്ഞാനം ഉണ്ടായിരിക്കണമെന്ന സാരം. എല്ലാ ഇഷ്ടദേവതകളും ഏകമായ സത്യവസ്തുവിനെ പരാമാത്മാവിനെ പ്രതിനിധാനം ചെയ്യുന്നു. ഈ സത്യം അനുഭവയോഗ്യമാകുന്നതിനെ സാക്ഷാത്കാരം എന്നുപറയുന്നു. ഈ അവസ്ഥ പ്രാപിക്കുന്നതുവരെ ഒരാള് ഇഷ്ടദേവതയെ അനന്വഭക്തിയോടുകൂടി ആരാധിക്കുക.
ഈശ്വരദര്ശനത്തിനുള്ള അഭിവാഞ്ഛ നിങ്ങളുടെ ഉള്ളില് ആളിക്കത്തിക്കൊണ്ടിരിക്കണം. ഈ അഭിവാഞ്ഛയാണ് തീവ്രമായ സാധന ചെയ്യുവാന് ജീവിതത്തിലെ വെല്ലുവിളികളെ നേരിടാനും സകല ക്ലേശങ്ങളെയും നിര്വ്വികാരതയോടെ സഹിക്കാനുമുള്ള ശക്തിദാനം ചെയ്യുന്നത്.
– രമാദേവി
തയ്യാറാക്കിയത്: ടി. ഭാസ്കരന് കാവുംഭാഗം
