കോലമഹര്ഷിയുടെ കാലത്തിനുശേഷം പല യുഗങ്ങളും കടന്നുപോയി. കലിയുഗത്തിന്റെ തീക്ഷ്ണതയില് ഈ സ്ഥലവും ഇവിടെ ആവിര്ഭവിച്ച ഈശ്വരചൈതന്യവും തമസ്സിന്റെ ആവരണത്തില് മറഞ്ഞുകിടന്നു. പിന്നീട് കേരളത്തില് ജനിച്ച ശ്രീശങ്കരാചാര്യര് ഭാരതം മുഴുവന് സഞ്ചരിച്ച് വരവെ ഈ സ്ഥലത്തും എത്തിപ്പെട്ടു. ഇവിടെ ആത്മജ്യോതിസ്സിന്റെ സാന്നിദ്ധ്യം ആചാര്യ സ്വാമികള്ക്ക് അനുധ്യാനത്തില് ബോധ്യമായി. അതിന്റെ യാഥാര്ത്ഥ്യം കണ്ടെത്താനായി അദ്ദേഹം കുടജാദ്രി എന്നറിയപ്പെടുന്ന മലയുടെ മുകളില് ധ്യാന നിമഗ്നനായി തപസ്സാരംഭിച്ചു. ധ്യാനനിമഗ്നനായ ശങ്കരാചാര്യരുടെ അന്തര് ദൃഷ്ടിയില് ഇവിടെ സാന്നിദ്ധ്യം വഹിക്കുന്ന മൂലപ്രകൃതിയായ ആദി ശക്തിയുടെ സാന്നിദ്ധ്യം തെളിഞ്ഞുവന്നു. തന്റെ തപസ്സ് പൂര്ത്തീകരിച്ച് കുടജാദ്രിമലയില്നിന്നും തിരിച്ച് യാത്രയായി. അങ്ങനെ മൂകാംബിക ക്ഷേത്രം നില്ക്കുന്ന സ്ഥലത്തെത്തിയപ്പോള് ജ്യോതിര്ലിംഗം അദ്ദേഹം ദര്ശിക്കുകയും അതില് ആദിമൂല ശക്തിയുടെ സാന്നിദ്ധ്യം പ്രകടമാവുകയും ചെയ്തു. ആ ശക്തി ഈ സ്ഥല ത്തിന്റെ പൂര്വകാല മഹിമകള് ശങ്കരന് ഉണര്ത്തികൊടുക്കുകയും ഈ കേന്ദ്രത്തില് വന്ന് തന്നെ ആശ്രയിക്കുന്ന ഭക്തന്മാര്ക്ക് താന് അഭയം നല്കി രക്ഷിച്ചുകൊള്ളാമെന്നും ഈ കേന്ദ്രം ശക്തിയുടെയും ജ്ഞാനത്തിന്റെയും ഊര്ജ്ജകേന്ദ്രമായിതീരുമെന്നും അരുളിചെയ്തു. അവിടുത്തെ പ്രേരണയാല് ശങ്കരാചാര്യര് ഈ കേന്ദ്രത്തില് ആ ശക്തിയെ ആരാധിക്കാനുള്ള സമ്പ്രദായങ്ങളും പൂജാമാര്ഗങ്ങളും നിര്ദ്ദേശിച്ചു. അപ്രകാരമാണ് മൂകാംബികാക്ഷേത്രത്തിന്റെ ഇന്നത്തെ നിലയിലുള്ള ആവിര്ഭാവത്തിന് തുടക്കം കുറിക്കുന്നത്.
-തഥാതന്
