416. ഏഷണീയം: ജീവാത്മാവ് അകപ്പെട്ടിരിക്കുന്ന ശരീരത്തിന്റെ ഘടനയും അതിലുള്ള ഇന്ദ്രിയങ്ങളുടെ പ്രവര്ത്തനവും ജീവചൈതന്യത്തെ ചേഷ്ടിപ്പിക്കുന്നു. ആ ചേഷ്ടകള് ബാഹ്യമാണ്. ആന്തരമായ ജീവാത്മചൈതന്യം അതിന്റെ പ്രഭവസ്ഥാനമായ പരമാത്മ ചൈതന്യത്തെ സദാ തേടിക്കൊണ്ടിരിക്കും. ജീവാത്മ ചൈതന്യത്തിന് പരമാത്മചൈതന്യം ഏഷണീയമാണ്. ആ പരമ ചൈതന്യത്തിന് നല്കിയ പേരാണ് ഭഗവാന്. സ്തോത്രത്തിലെ ആയിരം നാമങ്ങള്ക്കും അര്ത്ഥം ഒന്നുംതന്നെ ഉദ്ദേശ്യം ആ ചൈതന്യത്തെക്കുറിച്ചുള്ള ഏഷണ.
417. അനുല്ലംഘിതശാസന: ലംഘിക്കാനാകാത്ത ആജ്ഞാനുശക്തി ഉള്ളവന്. പ്രപഞ്ചത്തിലുള്ള ജഡവും ജീവിയും ചരവും അചരവുമായ എല്ലാം ഭഗവാന്റെ സങ്കല്പ്പമനുസരിച്ചു പ്രവര്ത്തിക്കുന്നു. കാലത്തെ ചക്രത്തിന്റെ രൂപത്തില് കയ്യിലേന്തുന്ന ഭഗവാന് സൃഷ്ടിക്കുകയും നിലനിറുത്തുകയും നശിപ്പിക്കുകയും ചെയ്യുന്നതിന് അലംഘനീയമായ നിയമങ്ങള് ഉണ്ടാക്കിയിട്ടുണ്ട്. സങ്കല്പം മാത്രം കൊണ്ടുണ്ടായ ആ ആജ്ഞയനുസരിച്ചാണ് സൂര്യചന്ദ്രന്മാരുടെ ഉദായാസ്തമയങ്ങള്. ചൂടും വെളിച്ചവും ഇരുട്ടും തണുപ്പും വേണ്ടകാലത്തു സംഭവിക്കുന്നു. കടല് കരയെ മുക്കിക്കളയുന്നില്ല. കടല് വറ്റിപ്പോകുന്നുമില്ല. വ്യതിചലിക്കുന്നില്ല. സര്വഭക്ഷകനായ അഗ്നി ജനപദങ്ങളെ ഭസ്മീകരിക്കുന്നില്ല. ഓരോ മരവും ചെടിയും അതതിന്റെ തന്മ നിലനിറുത്തുന്നു. ഓരോ പ്രാണിവര്ഗവും അവയ്ക്ക് ഭഗവാന് നിര്ദ്ദേശിച്ചിട്ടുള്ള ആകൃതിയും പ്രകൃതിയും നിലനിറുത്തുന്നു. ദേവന്മാരും അസുരരും മനുഷ്യരും പക്ഷികളും മൃഗങ്ങളും സൂക്ഷമ ജീവികളുമെല്ലാം ഭഗവാന്റെ സങ്കല്പമനുസരിച്ചുതന്നെ ഉണ്ടാകുകയും നിലനില്ക്കുകയും നശിക്കുകയും ചെയ്യുന്നു. ഭഗവദിച്ഛ അലംഘനീയമാണ്.
ഡോ. ബി.സി.ബാലകൃഷ്ണന്
(തുടരും)
