412. ഏകനാഥ: ഒരേ ഒരു നാഥനായവന്. മനുഷ്യരുടെയും ദേവന്മാരുടെയും അസുരരുടെയും മറ്റും നാഥന്മാരായി പലരേയും ഓരോ സന്ദര്ഭത്തില് എടുത്തു പറയാന് കഴിയും. അവരുടെ നാഥപദവി ഏതാനും നാളത്തേയ്ക്കേ കാണൂ. വളരെ ചെറിയ ഒരു പ്രദേശത്തുമാത്രമേ അവരുടെ പദവി വ്യാപിക്കുകയുമുള്ളൂ. എല്ലാ മണ്ഡലങ്ങളിലുമുള്ള സ്ഥാവരജംഗമങ്ങളായ എല്ലാത്തിനും എല്ലാകാലത്തും ഏകനാഥനായി വിരാജിക്കുന്ന ഗുരുവായൂരപ്പനെ സമം അവതരിപ്പിക്കുന്നു.
413. ഏകമൂര്ത്തി: ഒരേഒരു രൂപം മാത്രം ഉള്ളവന്. ഭഗവാന് ഒരു മൂര്ത്തിയേ ഉള്ളൂ എന്നുപറഞ്ഞാല് ആ അഭിപ്രായം സ്വീകരിക്കാന് വിഷമമായിരിക്കും. നമുക്കോരോരുത്തര്ക്കും ഭഗവാന്റെ അനേകം മൂര്ത്തികളെക്കുറിച്ചു കേട്ടറിവെങ്കിലുമുണ്ട്. നമുക്ക് പരിചയമുള്ള അമ്പലങ്ങളില്ത്തന്നെ ഭഗവാനെ എത്രയെത്ര രൂപങ്ങളിലാണ് പ്രതിഷ്ഠിച്ചു പൂജിക്കുന്നത്. പുരാണങ്ങളിലും ഇതിഹാസങ്ങളിലും നാം പരിചയപ്പെട്ട എത്രയെത്ര മൂര്ത്തികളുണ്ട്. അങ്ങനെയുള്ള ഭഗവാനെ ഏകമൂര്ത്തിയെന്നുപറയുന്നതെങ്ങനെ. കുരുടന്മാര് ആനയെ കണ്ട കഥ പ്രചാരത്തിലുണ്ടല്ലോ. അവരവര് തൊട്ടറിഞ്ഞ രീതിയില് അവര് ആനയെ ഉള്ക്കൊണ്ടു. അതുതന്നെയാണ് നമുക്കും സംഭവിച്ചത്. ഭഗവാന്റെ ലീലകള് അവരവര് അറിഞ്ഞരീതിയില് ആചാര്യന്മാര് പുരാണേതിഹാസങ്ങളിലും ചിത്രങ്ങളിലും ശില്പങ്ങളിലും ആവിഷ്ക്കരിച്ചു. നമ്മുടെ മനസ്സിലും സമൂഹമനസ്സിലും അവ രൂഡമായി. നിരാകരനും ഗുണാതീതനും സ്ഥലകാലപരിമിതികള്ക്ക് അതീതനുമായ ഗുരുവായൂരപ്പന് ആയിരമായിരം രൂപങ്ങളും വര്ണങ്ങളും ഗുണങ്ങളും നാമങ്ങളുമുണ്ടായി. ഇവയില് ഏതിനെ ആരാധിച്ചാലും ആരാധന തീവ്രമായ ഭക്തിയിലെത്തുമ്പോള് ആകാരങ്ങളെല്ലാം മറഞ്ഞ് നിബിഡതരമായ തേജസ്സുമാത്രം അവശേഷിക്കും.
(തുടരും)
ഡോ. ബി.സി.ബാലകൃഷ്ണന്
