കൊച്ചി: വനിതകള്ക്കായി വനിതകള് ഓടിക്കുന്ന വനിതകളുടെ ടാക്സി കൊച്ചിയിലുമെത്തുന്നു. എല്ലാ ദിവസവും 24 മണിക്കൂറും സ്ത്രീ യാത്രക്കാര്ക്ക് സേവനം ലഭ്യമാക്കാനുദ്ദേശിച്ച് നവംബറില് തിരുവനന്തപുരത്തു തുടങ്ങിയ ഷീ ടാക്സി സംവിധാനം തിങ്കളാഴ്ച വൈകിട്ട് നാലിന് എറണാകുളം ടൗണ്ഹാളില് മുഖ്യമന്ത്രി ഉമ്മന്ചാണ്ടിയാണ് ഉദ്ഘാടനം ചെയ്യുക. ഷീ ടാക്സിയുടെ ഗുഡ്വില് അംബാസിഡറും നടിയുമായ മഞ്ജു വാര്യര് ആദ്യ സര്വ്വീസ് ഫ്ലാഗ് ഓഫ് ചെയ്യും. സാമൂഹ്യനീതി വകുപ്പിനു കീഴിലുള്ള ജെന്ഡര് പാര്ക്കിന്റെ നേതൃത്വത്തിലാണ് ഷീ ടാക്സി യാഥാര്ഥ്യമാക്കുന്നത്.
അപരിചിത നഗരങ്ങളില് അസമയത്ത് ഒറ്റയ്ക്ക് സഞ്ചരിക്കേണ്ടി വരുന്ന സ്ത്രീകളുടെ ബുദ്ധിമുട്ടുകള് തനിക്ക് നേരിട്ട് അറിയാവുന്നതിനാലാണ് ഇത്തരത്തിലുള്ള സംരംഭത്തെ താന് പിന്താങ്ങുന്നത് എന്ന് മഞ്ജു വാര്യര് പറഞ്ഞു. ഷീ ടാക്സിയുടെ സ്വീകാര്യതയില് തനിക്ക് സന്തോഷമുണ്ടെന്നും പുരുഷകേന്ദ്രീകൃതമായ മേഖലയിലേക്ക് ധൈര്യപൂര്വ്വം കടന്നുവന്ന് ടാക്സി സര്വ്വീസിനു സന്നദ്ധരായ സ്ത്രീകളോട് തനിക്കു ബഹുമാനമുണ്ടെന്നും മഞ്ജു വാര്യര് പറഞ്ഞു.
ഷീ ടാക്സി രേഖകള് മുന് എംപി പി.വി.അബ്ദുള് വഹാബിനും മാരുതി സുസുക്കി ഓപ്പറേഷന്സ് ഹെഡ് ആങ്കുര് ശര്മയ്ക്കും കൈമാറിക്കൊണ്ട് പി. രാജീവ് എംപി അവയുടെ വിതരണം നിര്വ്വഹിക്കും.
പ്രൊഫ. കെ.വി.തോമസ് എംപി, സാമൂഹ്യനീതി വകുപ്പു മന്ത്രി ഡോ.എം.കെ. മുനീര്, പൊതുമരാമത്തു വകുപ്പു മന്ത്രി വി.കെ. ഇബ്രാഹിംകുഞ്ഞ്, എക്സൈസ്-ഫിഷറീസ്- തുറമുഖ വകുപ്പു മന്ത്രി കെ.ബാബു, ഭക്ഷ്യ സിവില് സപ്ലൈസ് വകുപ്പു മന്ത്രി അനൂപ് ജേക്കബ്, കൊച്ചി മേയര് ടോണി ചമ്മിണി, എംഎല്എമാരായ ബെന്നി ബഹനാന്, ഹൈബി ഈഡന്, കോര്പ്പറേഷന് ഡെപ്യൂട്ടി മേയര് ബി.ഭദ്ര, ജില്ലാ പഞ്ചായത്ത് പ്രസിഡന്റ് അഡ്വ. എല്ദോസ് പി.കുന്നപ്പള്ളില്, വൈസ് പ്രസിഡന്റ് ബിന്ദു ജോര്ജ്, കോര്പ്പറേഷന് കൗണ്സിലര് സുധ ദിലീപ്കുമാര്, വനിതാ വികസന കോര്പ്പറേഷന് ചെയര്പേഴ്സണ് അഡ്വ. പി.കുല്സു, ജില്ലാ കളക്ടര് എം.ജി.രാജമാണിക്കം, കൊച്ചി സിറ്റി പൊലീസ് കമ്മീഷണര് കെ.ജി.ജയിംസ്, എറണാകുളം ഡെപ്യൂട്ടി ട്രാന്സ്പോര്ട്ട് കമ്മീഷണര് പി.എ.സൈനുദ്ദീന് എന്നിവര് ചടങ്ങില് പങ്കെടുക്കും. സാമൂഹ്യനീതി വകുപ്പ് ഡയറക്ടര് വി.എന്.ജിതേന്ദ്രന് സ്വാഗതവും ജെന്ഡര് പാര്ക്ക് സ്പെഷ്യല് ഓഫീസര് ഡോ. പി.ടി.എം.സുനീഷ് നന്ദിയും പറയും.
ടെക്നോപാര്ക്ക് കേന്ദ്രീകരിച്ചുള്ള റെയിന് കണ്സേര്ട്ട് ടെക്നോളജീസ് ലിമിറ്റഡാണ് 24 മണിക്കൂറും പ്രവര്ത്തിക്കുന്ന കൊച്ചിയിലെ കോള് സെന്റര് വഴി ‘ഷീ ടാക്സി’ സേവനം നിയന്ത്രിക്കുക.
