372. സര്വ്വകാമദഃ – എല്ലാ കാമങ്ങളും നിറവേറ്റിത്തരുന്നവന്. ഒരാഗ്രഹവുമില്ലാത്ത ഒരു ജീവിയുമില്ല. ഒന്നും ആവശ്യമില്ലാത്ത ഈശ്വരനുപോലും താന് സൃഷ്ടിച്ച പ്രപഞ്ചത്തിന്റെ ക്ഷേമമെങ്കിലും ആഗ്രഹിക്കേണ്ടിവരും. മനസ്സില് ഒരാഗ്രഹമുണ്ടാകുമ്പോള് അത് സാധിക്കുന്നതിന് പരിശ്രമിക്കും. പരിശ്രമം വിജയിച്ചാല് സന്തോഷിക്കും. പരാജയപ്പെട്ടാല് ദുഃഖിക്കും. ഇതു ലോകഗതി. വിജയിച്ചാലുണ്ടാകുന്ന സന്തോഷവും സ്ഥിരമല്ല. ബന്ധപ്പെട്ടതോ അല്ലാത്തതോ ആയ വേറെ വികാരങ്ങള് ഓടിയെത്തും. പിന്നെ അത് സാധിക്കാനുള്ള പരിശ്രമമാകും. ഇങ്ങനെ ബഹുകോടി ജീവികള്ക്കുണ്ടാകുന്ന കാമങ്ങള് നേടാനുള്ള പരിശ്രമത്തിന്റെ സമഗ്രതയെയാണ് പ്രപഞ്ചപ്രവര്ത്തനമായി നാം അറിയുന്നത്. പ്രപഞ്ചപ്രവര്ത്തനത്തിന് ആവശ്യമായ കാമം ജീവികള്ക്ക് നല്കുന്നവന് എന്ന് നാമത്തെ വ്യാഖ്യാനിക്കാം.
എല്ലാ കാമങ്ങളെയും നശിപ്പിക്കുന്നവന് എന്നും നാമത്തെ വ്യാഖ്യാനിക്കാം. ഭഗവാന് ഭക്തന് കൊടുക്കുന്ന ഏറ്റവും വലിയ അനുഗ്രഹമാണ് വിരക്തി. കാമങ്ങളില് രതിയില്ലാത്ത അവസ്ഥയാണ് വിരക്തി. എല്ലാ കാമങ്ങളെയും നശിപ്പിച്ച് വൈരാഗ്യവും ജ്ഞാനവും ഭക്തിയും കൊടുത്തനുഗ്രഹിക്കുന്നവന്.
373. അനല – അഗ്നി, അഗ്നിദേവന്. അനലശബ്ദത്തിന് എത്രഭക്ഷിച്ചാലും തൃപ്തിവരാത്തവന് എന്നും പ്രപഞ്ചത്തില് ജീവനെ നിലനിറുത്തുന്നവന് എന്നും അര്ത്ഥമുണ്ട്.
മനുഷ്യസമൂഹത്തിന്റെ വളര്ച്ചയും നിലനില്പിനും ഏറ്റവും കൂടുതല് സഹായിക്കുന്ന രണ്ടു ദേവശക്തികളാണ് അനലനും അനിലനും. അനിലന് അഥവാ വായു പ്രാണനായി പല രൂപത്തില് ശരീരത്തെ പ്രവര്ത്തിപ്പിക്കുന്നു. അഗ്നി ജഠരത്തില് ജഠരാഗ്നിയായി ആഹാരം ദഹിപ്പിച്ച് ശരീരത്തെ പോഷിപ്പിക്കുന്നു. അടുക്കളയില് പാചകാഗ്നിയായി ആഹാരം പാകംചെയ്യുന്നു. വിളക്കില് ദീപാഗ്നിയായി വെളിച്ചം തരുന്നു. തണുപ്പുകാലത്ത് അലോതാഗ്നിയായി ചൂടുപകര്ന്നു. യാഗശാലയില് യാഗാഗ്നിയായി ദേവന്മാരെ തൃപ്തിപ്പെടുത്തുന്നു. ആധുനികസാഹചര്യത്തില് വാഹനങ്ങളെ ചലിപ്പിക്കുന്നതും യന്ത്രങ്ങളെ പ്രവര്ത്തിപ്പിക്കുന്നതും വിളക്കും ഫാനും റേഡിയോയും ടി വിയും മറ്റനേകമനേകം ഉപകരണങ്ങളും പ്രവര്ത്തിപ്പിക്കുന്നതും അഗ്നിയാണ്. തോക്കും മിസെയിലും ബോംബും പോലെയുള്ള ആധുനികായുധങ്ങളിലെ സ്ഫോടകശക്തിയും അഗ്നിയാണ്. അടിഞ്ഞുകൂടുന്ന മാലിന്യങ്ങളെ നശിപ്പിച്ച് നാടും വീടും ശുദ്ധിയാക്കുന്നതും അഗ്നിയാണ്. ഇത്രയൊക്കെ പ്രാധാന്യമുള്ള അഗ്നി ഗുരുവായൂരപ്പന്റെ രൂപമാണ്.
(തുടരും)
ഡോ. ബി.സി.ബാലകൃഷ്ണന്
