കൊച്ചി: മെട്രോ റെയില് നിര്മാണവുമായി ബന്ധപ്പെട്ട് അടിസ്ഥാന സൗകര്യവികസനവും മുന്നൊരുക്കങ്ങളും നടത്തുന്ന കാര്യത്തില് കോര്പ്പറേഷനും സര്ക്കാരും ഗുരുതരമായ വീഴ്ചയാണ് വരുത്തിയിരിക്കുന്നത്. നഗരവികസനത്തിന് തടസ്സം നില്ക്കുന്ന കൊച്ചി മേയര് ടോണി ചമ്മണി രാജി വയ്ക്കണമെന്ന ബിജെപി എറണാകുളം നിയോജകമണ്ഡലം പ്രസിഡന്റ് കെ.എസ്.സുരേഷ് കുമാര് ആവശ്യപ്പെട്ടു. മേയറും എംഎല്എയും ഈ വിഷയത്തില് പരസ്പ്പരം കുറ്റപ്പെടുത്തി ജനങ്ങളെ കബളിപ്പിക്കുകയാണ്. മെട്രോ റെയില് നിര്മാണത്തിന്റെ മുന്നൊരുക്കം നടക്കാത്തതുമൂലം നഗരത്തില് രൂക്ഷമായ ഗതാഗതക്കുരുക്കാണ് അനുഭവപ്പെടുന്നത്. വ്യാപാരസ്ഥാപനങ്ങളെ ഗുരുതരമായി ബാധിച്ചു.
പുല്ലേപ്പടി-തമ്മനം റോഡ് വികസനം നടത്തുക, അപ്രോച്ച് റോഡ് പണിയുക, നടപ്പാത, മേല്പ്പാലം തുടങ്ങിയ കാര്യങ്ങളില് സര്ക്കാരം കോര്പ്പറേഷനും അമ്പേ പരാജയപ്പെട്ടു. നഗരത്തിലെ ഗതാഗതക്കുരുക്കിന് പരിഹാരം കാണുക, റോഡുകള് വീതി കൂട്ടുക, മേല്പ്പാലം പണിയുക, നടപ്പാത ഉണ്ടാക്കുക, മെട്രോ നിര്മാണം വേഗത്തിലാക്കുക തുടങ്ങിയ ആവശ്യങ്ങള് ഉന്നയിച്ച് ബിജെപിയുടെ കരിദിനത്തോടനുബന്ധിച്ച് പുല്ലേപ്പടി ജംഗ്ഷനില് സംഘടിപ്പിച്ച പരിപാടി ഉദ്ഘാടനം ചെയ്തു സംസാരിക്കുകയായിരുന്നു അദ്ദേഹം.
വേനല് അവധി കഴിഞ്ഞ് വിദ്യാഭ്യാസ സ്ഥാപനങ്ങള് തുറക്കാനിരിക്കെ നിലവിലുള്ള ഗതാഗതക്കുരുക്കിന് പരിഹാരം കണ്ടില്ലെങ്കില് യാത്രാ ദുരിതം നേരിടേണ്ടി വരും. ഇനിയും ഇതിന് ശാശ്വത പരിഹാരം കാണാന് ബന്ധപ്പെട്ടവര് തയ്യാറായില്ലെങ്കില് ബിജെപി ശക്തമായ പ്രക്ഷോഭത്തിന് നേതൃത്വം കൊടുക്കും.
ബിജെപി നിയോജക മണ്ഡലം വൈസ് പ്രസിഡന്റ് കെ.എസ്.ദിലീപ് കുമാര് അദ്ധ്യക്ഷത വഹിച്ചു. ജനറല് സെക്രട്ടറിമാരായ പ്രകാശ് അയ്യര്, പി.ജി. അനില്കുമാര്, സെക്രട്ടറി യു.ആര്.രാജേഷ്, കേരള കോണ്ഗ്രസ് നാഷണലിസ്റ്റ് സംസ്ഥാന ജനറല് സെക്രട്ടറി കുരുവിള മാത്യസ്, പരിസ്ഥിതി സെല് ജില്ല കണ്വീനര് ഏലൂര് ഗോപിനാഥ്, വികസന സമിതി ജില്ല ജനറല് സെക്രട്ടറി ബാലകൃഷ്ണന്, ബിജെപി തൃക്കാക്കര മണ്ഡലം സെക്രട്ടറി സതീശന്, മഹിള മോര്ച്ച ജില്ലാ ജനറല് സെക്രട്ടറി സന്ധ്യ ജയപ്രകാശ്, അബിജു സുരേഷ്, ജയന് തോട്ടുങ്കല്, കെ.എന്.ചന്ദ്രശേഖരന് തുടങ്ങിയവര് പ്രസംഗിച്ചു. എം.കെ.ദിലീപ് കുമാര്, നവീന് ചന്ദ്ര ഷേണായ്, വി.വി.ലക്ഷ്മണന്, സുനില് ഗാന്ധിനഗര്, ഗോപിനാഥ് കമ്മത്ത്, നവീന് കമ്മത്ത്, നിത്യനന്ദ മല്ലന്, ബാലകൃഷ്ണ ഷേണായ്, എച്ച്. ദിനേഷ്, കെ.ജി.ബാലഗോപാല്, പി.എല്.ആനന്ദ്, രത്നാകര പൈ, സുനില് തീരഭൂമി, അജിത്ത് തുടങ്ങിയവര് നേതൃത്വം നല്കി.
