റാഞ്ചി: ബാറ്റുകൊണ്ട് ബ്രണ്ടന് മക്കല്ലവും പന്തുകൊണ്ട് രവീന്ദ്ര ജഡേജയും മോഹിത് ശര്മ്മയും തീമഴ പെയ്യിച്ച മത്സരത്തില് വിജയം ചെന്നൈ സൂപ്പര് കിംഗ്സിനൊപ്പം. മഴമൂലം വൈകി അവസാനിച്ച മത്സരത്തില് കൊല്ക്കത്ത നൈറ്റ് റൈഡേഴ്സിനെ 34 റണ്സിന് കീഴടക്കിയാണ് ചെന്നൈ ഐപിഎല് ഏഴാം പതിപ്പില് തുടര്ച്ചയായ അഞ്ചാം വിജയം കരസ്ഥമാക്കിയത്. 12 റണ്സിന് നാല് വിക്കറ്റുകള് വീഴ്ത്തിയ രവീന്ദ്ര ജഡേജയുടെയും 22 റണ്സിന് മൂന്ന് വിക്കറ്റ് വീഴ്ത്തിയ മോഹിത് ശര്മ്മയുടെയും ഉജ്ജ്വല ബൗളിംഗാണ് ചെന്നൈക്ക് തകര്പ്പന് വിജയം സമ്മാനിച്ചത്. മഴമൂലം വൈകി തുടങ്ങിയ മത്സരം 17 ഓവറായി കുറച്ചിരുന്നു. ആദ്യം ബാറ്റ് ചെയ്ത ചെന്നൈ സൂപ്പര് കിംഗ്സ് മൂന്ന് വിക്കറ്റ് നഷ്ടത്തില് 148 റണ്സെടുത്തു. 40 പന്തില് നിന്ന് 56 റണ്സെടുത്ത ബ്രണ്ടന് മക്കല്ലമാണ് ടോപ് സ്കോറര്. മറുപടി ബാറ്റിംഗിനിറങ്ങിയ കൊല്ക്കത്ത നൈറ്റ് റൈഡേഴ്സിന് ഒമ്പത് വിക്കറ്റ് നഷ്ടത്തില് 114 റണ്സെടുക്കാനേ കഴിഞ്ഞുള്ളൂ. രണ്ട് പേര് മാത്രമാണ് കൊല്ക്കത്ത നിരയില് രണ്ടക്കം കടന്നത്. 47 റണ്സെടുത്ത റോബിന് ഉത്തപ്പയാണ് ടോപ് സ്കോറര്. യൂസഫ് പഠാന് 41 റണ്സുമെടുത്തു.
ആറ് മത്സരങ്ങള് കളിച്ച ചെന്നൈ ഒരെണ്ണത്തിലാണ് പരാജയപ്പെട്ടത്. ഏപ്രില് 18ന് അബുദാബിയില് നടന്ന മത്സരത്തില് കിംഗ്സ് ഇലവന് പഞ്ചാബിനോടാണ് ആറ് വിക്കറ്റിന്റെ പരാജയം ഏറ്റുവാങ്ങിയത്. അതിനുശേഷം അപരാജിത കുതിപ്പാണ് ധോണിപ്പട നടത്തുന്നത്. ആറ് മത്സരങ്ങള് കളിച്ച കൊല്ക്കത്തയുടെ നാലാം പരാജയമാണിത്.
നേരത്തെ ടോസ് നേടിയ ചെന്നൈ ബാറ്റിംഗ് തെരഞ്ഞെടുത്തെങ്കിലും സ്കോര് 20-ല് എത്തിയപ്പോള് ആദ്യ വിക്കറ്റ് നഷ്ടമായി. 11 പന്തില് നിന്ന് 16 റണ്സെടുത്ത ഡ്വെയ്ന് സ്മിത്തിനെ ഷാക്കിബ് അല് ഹസന് വിക്കറ്റിന് മുന്നില് കുടുക്കി. എന്നാല് മക്കല്ലത്തിന് കൂട്ടായി റെയ്ന എത്തിയതോടെ ചെന്നൈയുടെ സ്കോറിംഗിനും വേഗം കൂടി. ഒടുവില് 10.4 ഓവറില് 90-ല് എത്തിയപ്പോഴാണ് ഈ കൂട്ടുകെട്ട് പിരിഞ്ഞത്. 25 പന്തില് നിന്ന് 31 റണ്സെടുത്ത റെയ്നയെ ഷക്കിബിന്റെ പന്തില് സൂര്യകുമാര് യാദവ് പിടികൂടി. പിന്നീട് 11.4 ഓവറില് ചെന്നൈ സ്കോര് 100 കടന്നു. അധികം കഴിയും മുന്നേ മക്കല്ലം അര്ദ്ധസെഞ്ച്വറിയും പിന്നിട്ടു. 32 പന്തില് നിന്ന് അഞ്ച് ഫോറും രണ്ട് സിക്സുമുള്പ്പെട്ടതായിരുന്നു ഇന്നിംഗ്സ്. സ്കോര് 119-ല് എത്തിയപ്പോള് മക്കല്ലത്തെ റസ്സല് യൂസഫ് പഠാന്റെ കൈകളിലെത്തിച്ചു. പിന്നീട് 17 പന്തില് നിന്ന് 22 റണ്സെടുത്ത ധോണിയും 10 പന്തില് നിന്ന് 17 റണ്സെടുത്ത രവീന്ദ്ര ജഡേജയും ചേര്ന്ന് സ്കോര് 148-ല് എത്തിച്ചു.
മറുപടി ബാറ്റിംഗിനിറങ്ങിയ കൊല്ക്കത്തയ്ക്ക് തുടക്കത്തിലേ തിരിച്ചടി നേരിട്ടു. സ്കോര് ബോര്ഡില് 17 റണ്സുള്ളപ്പോള് 6 റണ്സെടുത്ത ഗംഭീറിനെയും 36-ല് എത്തിയപ്പോള് നാല് റണ്സെടുത്ത കല്ലിസിനെയും 38-ല് എത്തിയപ്പോള് ഒരു റണ്സെടുത്ത മനീഷ് പാണ്ഡെയെയും ഇതേ സ്കോറില് തന്നെ ഷക്കിബ് അല് ഹസനെയും (0) നഷ്ടപ്പെട്ടു. ഈ തകര്ച്ചയില് നിന്ന് കരകയറാന് കൊല്ക്കത്തക്ക് കഴിഞ്ഞില്ല. സ്കോര് 65-ല് എത്തിയപ്പോള് കഴിഞ്ഞ മത്സരങ്ങളില് മികച്ച ബാറ്റിംഗ് കാഴ്ചവെച്ച സൂര്യകുമാര് യാദവിനെയും (8) നഷ്ടമായി. പിന്നീട് റോബിന് ഉത്തപ്പക്കൊപ്പം ചേര്ന്ന യൂസഫ് പഠാന് കൊല്ക്കത്തയെ മത്സരത്തിലേക്ക് തിരിച്ചെത്തിക്കാന് ശ്രമിച്ചെങ്കിലും സ്കോര് 88-ല് എത്തിയപ്പോള് 38 പന്തില് നിന്ന് അഞ്ച് ഫോറും ഒരു സിക്സറുമടക്കം 47 റണ്സെടുത്ത ഉത്തപ്പയെ ജഡേജ ധോണിയുടെ കൈകളിലെത്തിച്ചു. തുടര്ന്നെത്തിയ ആന്ദ്രെ റസ്സല് (1), പിയൂഷ് ചൗള (1), യൂസഫ് പഠാന് (29 പന്തില് 41) എന്നിവരും മടങ്ങിയതോടെ കൊല്ക്കത്ത 114-ല് ഒതുങ്ങി. നാളെ നടക്കുന്ന മത്സരത്തില് കൊല്ക്കത്ത രാജസ്ഥാന് റോയല്സിനെയും ചെന്നൈ ദല്ഹി ഡെയര് ഡെവിള്സിനെയും നേരിടും.
