343. വാസുദേവ പൗണ്ഡ്രകമുക്തിദഃ – പൗണ്ഡ്രകവാസുദേവന് മോക്ഷം കൊടുത്തവന്.
കരൂഷ രാജ്യത്തിലെ രാജാവായി ഒരു വാസുദേവന് ഉണ്ടായിരുന്നു. പൗണ്ഡ്രകന് എന്നൊരു മകന് വാസുദേവനുണ്ടായി. പൗണ്ഡ്രകന് രാജാവായപ്പോള് മുഖസ്തുതിക്കാരായ സേവകര് യഥാര്ഥവാസുദേവന് ഇയാളാണെന്നുപറഞ്ഞു കേള്പ്പിച്ചത് വിശ്വസിച്ച പൗണ്ഡ്രകന്റെ മനസ്സില് താന് വിഷ്ണുവിന്റെ അവതാരമാണെന്ന ധാരണ ഉറച്ചു. തന്റെ നെഞ്ചില് വൈഷ്ണ ചിഹ്നമായ ശ്രീവത്സമുണ്ടാക്കാന് വേണ്ടി തീവച്ചുപൊള്ളിച്ച് അടയാളമുണ്ടാക്കി. വിലപിടിപ്പുള്ള ഒരു രത്നം വാങ്ങി കൗസ്തുഭമെന്ന മട്ടില് കഴുത്തിലണിഞ്ഞു. മകരമത്സ്യത്തിന്റെ ആകൃതിയുള്ള കുണ്ഡലങ്ങളും മഞ്ഞവസ്ത്രങ്ങളുമണിഞ്ഞു. കരിമ്പുകൊണ്ട് നിര്മിച്ച സുദര്ശനചക്രവും ഗദയും താമരയും ശംഖുമൊക്കെ മാറിമാറി കൈയിലെടുത്തു. ഇത്രയൊക്കെയായപ്പോള് താന് വിഷ്ണുവിന്റെ അവതാരമാണെന്ന് മറ്റുള്ളവരും അംഗീകരിക്കണമെന്നായി. ദ്വാരകയില് മറ്റൊരു വാസുദേവന് വി ഷ്ണുവിന്റെ അവതാരമെന്ന മട്ടില് കഴിയുന്നുവെന്ന് കേട്ടപ്പോള് പൗണ്ഡ്രകന് ഒരു ദൂതനെ ദ്വാരകയിലേക്കയച്ചു.
ഡോ. ബി.സി.ബാലകൃഷ്ണന്
(തുടരും)
